Estre xoves, 16 de setembro, a Televisión de Galicia presenta unha nova tempada do programa Land Rober con catro invitadas moi especiais. Adi Iglesias, Susana Rodríguez Gacio, Ana Peleteiro e Teresa Portela acudirán ao late night show conducido por Roberto Vilar.
As catro deportistas competiron neste verán nos Xogos Olímpicos e Paralímpicos de Tokyo 2020, representando ao deporte galego e español e acadando grandes resultados. No programa da televisión galega serán entrevistadas polo presentador de Land Rober e deberán enfrontarse aos seus retos.
Ver esta publicación en Instagram
Os éxitos das nosas olímpicas e paralímpicas
No pasado mes de agosto, as galegas Adi Iglesias e Susana Rodríguez Gacio foron parte da expedición española nos Xogos Paralímpicos. A primeira competiu nos 100 e nos 400 metros, acadando un ouro nos 100 metros T13 e a prata nos 400 metros da mesma modalidade.
Pola súa parte, Susana fixo historia, sendo a primeira deportista en competir en dúas modalidades distintas na mesma edición dos Xogos Paralímpicos. A galega foi ouro na súa especialidade, o paratríatlon, e resultou finalista nos 1.500 metros T11. Ademais, a atleta acudiu esta mesma semana a outro late night, o de David Broncano en La Resistencia.
Tres medallas e tres diplomas, os éxitos das nosas catro paralímpicas
Unhas semanas antes, Ana Peleteiro e Teresa Portela tamén farían historia para o olimpismo galego e español. A primeira delas, bateu dúas veces o récord español de triplo salto, cunhas marcas que lle deron o bronce olímpico.
A segunda, despois de dúas décadas na elite e nos seus sextos Xogos Olímpicos, acadou a súa primeira medalla olímpica, unha prata no K1 200.
Desde as 22:35 horas deste xoves, poderemos ver ás nosas olímpicas e paralímpicas con Roberto Vilar no Land Rober.
