A triplista olímpica galega Ana Peleteiro (Ribeira, 1995), xunto co futbolista galego do Real Madrid, Lucas Vázquez (Curtis, 1991), e a adestradora persoal e ex deportista de elite da Selección Española de natación, Crys Dyaz, anuncian a apertura en setembro dun ximnasio na Coruña baixo a marca Crys Dyaz & Co.
Segundo explican, nunha nota remitida aos medios de comunicación, trátase dun “centro de adestramento persoal, fisioterapia e nutrición”. Sería o terceiro creado pola empresaria Crys Dyaz na Península, o primeiro fóra de Madrid. Este triplete de deportistas e empresarios din elixir A Coruña para “emprender en común e ofrecer un novo concepto de calidade e deseño, no que se unen deporte e saúde para conseguir que os seus pacientes transforman o seu corpo e a súa vida cara a un estilo saudable”.
A marca Crys Dyaz & Co di basearse en “tres piares fundamentais: fisioterapia, nutrición e adestramento persoal”. “E agora moito máis, unindo forzas con dous deportistas de elite, cos que non só úneme a miña paixón polo deporte, tamén unha gran amizade e o obxectivo de promover a saúde física, e por tanto mental, tan esencial para todo o mundo”, sinala a adestradora Crys Dyaz.
Ana Peleteiro resalta que “coñecer a Crys e converterme no seu paciente foi sen dúbida un punto de inflexión. Tras comprobar a metodoloxía e os resultados en primeira persoa tiven claro que tiñamos que ofrecer estes servizos ao pobo coruñés”.
“Desde o primeiro momento que me propuxeron o proxecto, tiven claro que quería formar parte del”, apunta o xogador de fútbol Lucas Vázquez, “non só pola relación tan especial que me une a nivel persoal, se non porque a nivel profesional admiro profundamente a traxectoria de Ana, de Crys e de Crys Dyaz & Co. Poder ofrecer á Coruña e os seus cidadáns un centro enfocado á saúde e ao deporte, terminoume de convencer”.
A saúde da muller, no centro da Coruña
Segundo aseguran desde a compañía, o novo centro de adestramento Crys Dyaz & Co. A Coruña “supón un avance no sector do adestramento persoal”.
Na presentación do espazo de adestramento Crys Dyaz & Co. falan tamén de “SaludFem” explicando que se trata dunha “unidade que revolucionou o sector convertendo a compañía en líder ao especializarse na muller e nas distintas etapas da súa vida. Un proxecto que xurdiu diante a necesidade real de ofrecer unha atención e acompañamento especializado e específico ás mulleres durante as etapas máis importantes da súa vida (adolescencia, embarazo, menopausa…)”.
No caso da Coruña, sinalan desde Crys Dyaz & Co. que neste novo centro “incluirase desde unha área de adestramento para mulleres embarazadas, con algunha patoloxía de chan pélvico ou en post parto, ata un espazo de tratamentos de cabina para a preparación ao parto”.
Ver esta publicación en Instagram
Crys Dyaz, Lucas Vázquez e Ana Peleteiro
Crys Dyaz é ex deportista de elite da selección de natación, adestradora persoal e fisioterapeuta, e agora é empresaria coñecida por ser a CEO de Crys Dyaz & Co. e SaludFem. Segundo aseguran desde a firma “axuda a persoas a estar sas e en forma, ademais de estar especializada no deporte á muller durante as distintas etapas da súa vida. Son xa moitos rostros recoñecidos do panorama español os que confían nela, da talla de María Pombo e Laura Escanes. Fóra do traballo, ela comparte moito contido sobre saúde física no seu perfil, @crysdyaz“.
Crys Dyaz & Co é o proxecto máis persoal da ex deportista de elite e recoñecida adestradora persoal e fisioterapeuta Crys Dyaz. Na actualidade, Crys Dyaz & Co. conta con dous centros, situados en La Moraleja e no centro comercial La Finca Grand Café de Pozuelo de Alarcón, ao que nuns meses vaise unir o do Parrote: Crys Dyaz & Co. A Coruña.
Neste ximnasio que se abrirá en setembro na Coruña conta como socios con Lucas Vázquez Iglesias, natural de Curtis (A Coruña), futbolista profesional que actualmente milita nas filas do Real Madrid, e a atleta de Ribeira Ana Peleteiro-Comaoré Brión.
Ana Peleteiro é unha das atletas españolas máis recoñecidas e carismáticas. Ana Peleteiro foi galardoada co Premio Princesa de Asturias en 2013 como mellor deportista do ano menor de 18 anos. É unha especialista na proba de triplo salto, participou nos Xogos Olímpicos de Tokio 2020, onde se alzou coa medalla de bronce.
A este palmarés a atleta galega suma dúas medallas de bronce no Campionato Mundial de Atletismo de Pista Cuberta, nos anos 2018 e no último desenvolvido este mesmo ano; e dúas medallas (oro e prata) no Campionato Europeo de Atletismo en Pista Cuberta.
