No 2019, tan só uns meses antes do inicio da pandemia, a vida de Almudena Quereda deu un xiro. Un accidente fixo que lle tiveran que amputar media perna por debaixo do xeonllo e reconstruír a parte dereita do corpo, pero a base de actitude e a través do deporte, a coruñesa segue a recuperarse e é un exemplo de superación con A de Atenea.
Enxeñeira de camiños e agora tamén nadadora, Quereda adestra no CN Liceo ás ordes dun adestrador do talle de Jesús de la Fuente, preparador da internacional María de Valdés e o paralímpico Jacobo Garrido.
Fóra da piscina, Almudena é a creadora do proxecto @a_de_atenea, un perfil de Instagram onde baixo tres piares da visibilidade á súa nova vida.

A natación, un deporte sen limitacións
O período de recuperación de Almudena Quereda comezou á vez que a pandemia de COVID-19, e ela mesma sinala que «o proceso físico como mental de recuperación está sendo moi duro. Agora estou moito mellor».
Como parte desta rehabilitación, a coruñesa retomou a natación, que antes practicaba por ocio, e na piscina «empecei a ver que na auga non tiña a limitación da perna e que de mellor ou peor maneira avanzaba».
Ver esta publicación en Instagram
@a_de_atenea
Co inicio da pandemia e as corentenas, Almudena Quereda estaba aínda dando comezo ao seu proceso de rehabilitación, nun contexto no que a saúde mental saltou á palestra.
«A raíz da COVID comezouse a falar de problemas de motivación, de saúde mental, de que a xente o pasaba mal e ese é un proceso polo que pasei. Aínda non estou totalmente recuperada, pero entendo de motivarme día a día para seguir adiante e de ter que levantarme e dicir: «Esta é a miña nova vida, con novas circunstancias, que foron así impostas». Entón empecei a pensar en como axudar a outras persoas a raíz da miña experiencia», recorda a nadadora sobre aqueles meses.

Así foi como naceu A de Atenea, nome que recibe a súa conta de Instagram, pero tamén o seu xeonllo. «Cando me apuntaron a perna dereita o equipo de traumatoloxía do CHUAC díxome que ían apuntala por riba do xeonllo e o equipo de ciruxía plástica dixo que como era xove, que ían intentar facelo por debaixo. Ter ou non xeonllo cambia a vida, pero a perna estaba moi moi dañada. Cando entrei na operación, non sabía se ía sair con xeonllo ou sen el e cando espertei na sala de rehabilitación, que é completamente branca, víñome á mente o Olimpo dos deuses e acordeime de Atenea, que é a deusa da sabiduría e a estratexia en combate», explica Almudena Quereda.
Almudena Quereda: «Cando espertei na sala de rehabilitación, que é completamente branca, víñome á mente o Olimpo dos deuses»
No momento, por mor da anestesia, a coruñesa non sabía se tiña xeonllo ou non, pero tomou a decisión de que, se o tiña, chamaríalle Atenea. «Ademais, o meu nome é Almudena, polo que o A é o compoñente de Atenea, Almudena e actitude. Engloba as tres partes», apunta.
Ver esta publicación en Instagram
Os tres piares de Atenea
Coa conta de Instagram creada, Almudena Quereda apostou por dividir o seu feed, ou as publicacións do seu perfil, en tres ramas: reflexións «con frases propias ou que me inspiran», ioga «que me axudou a rehabilitar o meu corpo para adquirir flexibilidade e forza» e natación «porque foi o meu salvoconducto».
Así, instantáneas na piscina altérnanse con frases motivadoras e posicións de ioga nunha rede social que para a nadadora do Liceo serviu de ponte para chegar a máis persoas.
Ver esta publicación en Instagram
«Instagram paréceme unha ferramenta coa que podes contactar con persoas de todo o mundo, dunha maneira moi sinxela e que ten os teus mesmos intereses», sinala. Co seu perfil, Quereda quere «axudar a outros e relacionarme con xente cos meus mesmos intereses, xa sexa no mundo da natación ou do ioga».
Un proxecto de superación e inclusión, 100% coruñés
A de Atenea é un proxecto con alma coruñesa. Así mesmo o define a propia Almudena Quereda, que traballa por facer medrar esta iniciativa, pero precisa de axuda externa.
No relativo ás subvencións, a deportista explica que «estou pendente de cara ao 2022 da FEGAN ou do Concello da Coruña, que xa lles pasei un dossier de patrocinios e dixéronme que para o orzamento do 2022 seguramente si recibiría algún tipo de axuda».
Iso desde o ámbito público, xa que co privado, Quereda está en negociacións: «Estou negociando con empresas galegas e coruñesas para que apoien o meu proxecto como un proxecto de superación e inclusión de persoas discapacitadas e do deporte como forma de rehabilitación. Nos tempos que corren e na pospandemia é algo que se viu que é moi necesario e saudable», apunta.
















