- A alcaldesa da Coruña, Inés Rey, recibiu ao Dépor ABANCA en María Pita, onde a afección celebrou o triunfo desde a praza
A alcaldesa da Coruña, Inés Rey, recibiu ao equipo e á directiva do Dépor ABANCA logo de acadar onte o ascenso á máxima categoría nacional do fútbol feminino, a Liga F. A rexedora compareceu acompañada por Álvaro García Diéguez, presidente do Deportivo, e por Cristina Martínez, capitana do Dépor ABANCA.
“Hoxe o orgullo da Coruña volve ser o orgullo das súas talentosas mulleres”, sinalou Inés Rey, que quixo destacar que hai 100 anos Irene González Basanta sentaba as bases do fútbol feminino coruñés: “Nesta urbe, as mulleres somos fillas do traballo en común, e o voso foi magnífico”, engadiu.
As xogadoras e o equipo técnico que lidera Irene Ferreras puideron celebrar desde o balcón do Palacio Municipal de María Pita o ascenso a Liga F xunto coa afección que se achegou ata a praza.
“Tanto a afección que acudiu en milleiros ao estadio de Riazor, como esa base fiel de seareiros e seareiras que sempre está en Abegondo, nas boas e nas malas, conforman con vós unha unidade virtuosa, non se pode entender a unhas sen as outras”, indicou Rey durante a súa intervención.
A alcaldesa fixo entrega ao Dépor ABANCA dunha Torre de Hércules conmemorativa da ocasión.
Ver esta publicación en Instagram
