Este domingo, 8 de agosto, finalizan os Xogos Olímpicos de Toquio 2020, nos que competiron ata dez deportistas galegas, en sete modalidades deportivas. olímpicas
Os éxitos galegos trouxeron dúas medallas a Galicia, ademais doutros dous diplomas.
Teresa Portela
Unha das actuacións máis destacadas destes Xogos foi a de Teresa Portela. A de Cangas foi quen de alzarse coa súa primeira medalla olímpica, unha prata, no K1 200 de piragüismo, nos que foron os seus sextos Xogos Olímpicos.
“Feliz. Porque quen a segue a consegue. Levo moitos anos intentando loitar por esa medalla”, asegurou a padexeira.
Ana Peleteiro
Outra deportista que fixo historia foi a ribeirense Ana Peleteiro. A atleta competiu no triplo salto, superando os seus propios récords.
A galega accedeu á final clasificándose como segunda no grupo A, só por detrás da súa amiga e compañeira Yulimar Rojas, quen remataría sendo a campioa olímpica, establecendo un novo récord mundial. Na final, Peleteiro bateu en dúas ocasións o récord de España absoluto, quedando finalmente en terceira posición ao chegar ata os 14,87 metros.
Coa repercusión acadada grazas ao seu éxito deportivo, a saltadora converteuse tamén nun exemplo reivindicando a súa negritude e antiracismo.
Támara Echegoyen
Fóra do podio quedou Támara Echegoyen, competidora no 49er FX de vela xunto á balear Paula Barceló. O conxunto de españolas olímpicas tivo que facer fronte a altibaixos na competición, sobrepoñendose a eles para chegar con posibilidades de medalla á final.
Na Medal Race, malia quedar en sexta posición, os puntos penalizados que acumularon Echegoyen e Balear valéronlles para quedar cuartas, a só un punto do terceiro posto. Desta forma, leváronse o diploma olímpico.
Antía Jácome
Tamén na auga nipona, e tamén con diploma olímpico, quedou Antía Jácome. A padexeira representou a España no C1 200, clasificándose na final da competición en quinta posición na súa primeira experiencia como olímpica.
“Sinto unha gran alegría por conseguir o diploma olímpico e por estar aí pelexando a regata ata o final, cunha chegada moi axustada para decidir quen se levaba a medalla de bronce”, aseguraba a deportista.
Belén Toimil
Dentro do apartado de galegas olímpicas que non acadaron nin medalla nin diploma, atópase Belén Toimil dentro do atletismo. A lanzadora de peso non estivo nas súas mellores marcas na cita nipona, facendo dous lanzamentos nulos na proba clasificatoria.
O terceiro lanzamento foi válido, pero deixou á galega a cinco centímetros da marca mínima para competir na final. Cos seus 17.38 metros, a atleta de Mugardos foi décimo terceira na eliminatoria.
“Dame rabia porque sei que podía telo feito e estou adestrando moi ben”, aseguraba Toimil tras a competición.
Belén Toimil queda fóra da final do lanzamento de peso olímpico
Tamara Abalde e Raquel Carrera
Nos deportes por equipos, dúas galegas formaron parte da Selección Española de baloncesto, un dos combinados máis fortes dos Xogos Olímpicos.
Raquel Carrera e Tamara Abalde estiveron na lista de Lucas Mondelo para Toquio. A ourensá participou en todos os partidos, xogando aproximadamente un cuarto por encontro, mentres que a viguesa quedou no banco por decisión técnica.
As españolas caeron finalmente en cuartos ante Francia. Nun encontro moi intenso e igualado, as vermellas olímpicas estiveron a piques de pasar á semifinal.
Raquel Carrera e Tamara Abalde finalizan a aventura olímpica
Alicia Fernández
Tampouco chegou nin á semifinal nin á final olímpica a Selección Española de balonmán, na que participou a galega Alicia Fernández.
Ao longo da competición, as Guerreras, entre as que estivo tamén Paula Arcos, do Atlético Guardés, así como José I. Prades dentro do corpo técnico, venceron dúas veces e perderon outras dúas.
No último encontro, as españolas perderon contra o Comité Olímpico Ruso. A vitoria de Hungría contra Suecia rematou por eliminar ás Guerreras olímpicas, que non pasaron da fase de grupos.
María Bernabeu
A judoka María Bernabeu, quen competiu na categoría de -70kg, non puido pasar do primeiro combate. A galega competiu contra a rusa Madina Taimazova, quedando eliminada por un 0-1.
GRACIAS GRACIAS GRACIAS
“El talento te abre las puertas pero ser agradecid@ te las mantiene abiertas”#juegosolimpicoTokyo2020 pic.twitter.com/6IwDrTOnDZ
— maria bernabeu (@bernabeumaria70) July 30, 2021
Julia Benedetti
No debut do skateboard como modalidade olímpica, e a xove Julia Benedetti nos Xogos Olímpicos, a rider galega rematou na 16ª posición da competición.
Coas puntuacións de 27.76 27.50 22.31, a coruñesa non pasou de rolda, pero a skater preferiu quedarse co importante entre as experiencias olímpicas: “Estar con outros deportistas, coñecer a tanta xente… É unha experiencia que se cadra só vives unha vez e hai que gozala a tope”.
Julia Benedetti: “Non o conseguín facer pero tenteino e marcho moi contenta”
