Coa chegada do ano olímpico 2020, nace As Nosas. Somos un xornal deportivo pensado para darlle o protagonismo que a muller no deporte en Galicia reclama e merece. Tratase dun medio dixital no que as mulleres son as protagonistas e que está dirixido a toda a sociedade galega, non só segmento feminino. Creemos que o deporte ten un público desexoso de consumir información máis aló do xénero de quen o practique.
O xornal nace en soporte dixital co enderezo www.asnosas.gal e contará con presenza activa en diferentes redes sociais como @asnosasdeportes. Así, conta con espazo en Twitter, Facebook, Instagram e YouTube.
A xornalista galega Silvia Carregal (A Coruña, 1973) lidera, como directora, un equipo conformado por tres redactores e que estará reforzado polos departamentos de deseño, fotografía, edición audiovisual e redacción de Ártabra Comunicación, empresa editoria de As Nosas.
Desde súa liña editorial, As Nosas pretende aportar unha visión de xénero que fomente na sociedade valores de igualdade, sororidade, respecto, superación, e competitividade sá.
En definitiva, As Nosas aspira a ser o xornal de referencia no deporte feminino en Galicia. Pretende pór en valor as actividades deportivas que as mulleres fan na nosa comunidade. Todo iso resúmese en tres ideas:
- Informar.
- Visibilizar.
- Empoderar.
En eventos deportivos coma mundiais, europeos ou XX.OO. as deportistas amosan unha progresión enorme. Reclaman visibilidade. É de xustiza dárllela, por compromiso, pola necesidade de concienciar sobre a igualdade en todos os ámbitos da sociedade, e porque ademais son noticia e hai que contalo.
