Galicia será a festa do fútbol sala feminino esta fin de semana. Pescados Rubén Burela e Poio Pescamar FS prepáranse para disputar a final da Supercopa de España este sábado, ás 12:00 horas, en Vista Alegre.
Se en algo coinciden ambos conxuntos é en que será un partido moi competido e igualado, pero ao que todas as xogadoras chegan con moita ilusión.
Julio Delgado, adestrador do Burela: “Volvemos ter un duelo galego nunha final nacional”
“Volvemos ter un duelo galego nunha final nacional e o noso equipo está concentrado, con moita ilusión ante un reto máis desta tempada”, declaraba en rolda de prensa Julio Delgado, adestrador do Burela.
Ao seu carón estaba Manu Cossío, técnico do Poio, que coincidiu co seu compañeiro de profesión en que no conxunto prima a ilusión por conseguir gañar “unha cita histórica para o club e unha oportunidade que non se presenta todos os días”.
A cita de Supercopa prevese como un pulso entre ambos conxuntos. “Será unha final moi disputada”, aseguraba Julio Delgado. Segundo o adestrador, as rivais son “un equipo moi competitivo, o ven demostrando toda a tempada, fixo un gran partido na final de Copa e é un equipo que vaino deixar todo”
Oportunidade para aplicar o aprendido da final da Copa
Mariñás e poienses xa disputaron unha final recentemente. En concreto a final da Copa da Raíña, celebrada en Málaga en decembro, que resultou nunha vitoria das Guerreiras Laranxas.
O Burela revalida o título de campión da Copa da Raíña de Fútbol Sala
Un partido moi recente pero do que o adestrador do entón equipo perdedor, o Poio Pescamar, non se quere guiar. A táctica que seguirán é a de chegar con opcións aos minutos finais do partido, “competindo ben e intentando poñer ao límite a un super equipo como son elas”, explicaba o técnico.
De todas formas, admite que a experiencia non será suficiente para dar coa clave para vecer facilmente ás da Mariña. “Meterlle man ao Burela é complicado. Son as vixentes campioas de todas as competicións e nesta tempada levan unha racha inmaculada. A nosa idea de partido pasa por intentar levar o partido ao noso terreo”, declaraba.
A vitoria está nos detalles e, por iso, “imos intentar que os duelos individuais caigan no noso favor e sobre todo ter un equilibrio emocional no partido. O tema de faltas pesounos na primeira parte de Málaga”, indicaba o adestrador do Poio Pescamar.
“Estamos nun contexto diferente. Aínda que pasou pouco marxe de tempo, seguramente teremos cambios ambos equipos. Elas recuperan a unha xogadora importante e teñen un fichaxe”, conclúe Manu Cossío.
Voltan ás capitás ao terreo de xogo.
Por parte do Poio, todo o plantel está dispoñible, así que o adestrador asegura que non haberá sorpresas na convocatoria. Respecto ao partido xogado en Málaga, recuperan á capitá Silvia, aínda que non aclarou se xogará ou non. Nas filas das laranxas, volve Peque, que estaba tocada no anterior duelo, e “é unha xogadora moi importante para nós”.
E precisamente en rolda de prensa tamén estiveron Peque e Silvia. A primeira confirmou que as Guerreiras Laranxas do Pescados Rubén Burela chegan fortes á final de Supercopa, tras ter vencido ao Ence Marín no partido de Copa.
Pola súa parte, a futbolista do Poio Pescamar, Silvia, admitiu que chegan dunha semana complicada pola eliminatoria ante o Ourense Envialia e que o partido será complicado “pero iso non quita a ilusión e as ganas”.
Preguntadas por como afrontan a cita da Supercopa, Silvia comentou que todo o seu equipo é consciente de que é un duelo moi importante. “Sería o noso primeiro título en Primeira División”, recorda. Con todo, tamén coñecen o nivel das súas rivais, un conxunto “moi completo, con xogadoras moi veteranas, partindo da capitá que é o estandarte do equipo, e están acostumadas a xogar finais”.
Xustamente esa capitá, Peque, resaltou entre as virtudes das futbolistas poienses a súa xuventude e atrevemento e que teñen entre as súas filas a algunhas das mellores pívots do país.
O Burela non sente a presión por acoller a Supercopa
“Está claro que xogamos en casa e para nós ten que ser un aliciente positivo e sobre todo que imos ter parte da nosa afección con nós e iso seguro que nos vai dar moitísima máis forza”, expresaba Delgado.
Malia isto, asegura que non hai favorito para gañar o título e que desde o Pescados Rubén Burela saben como traballar coa presión propia dunha final na loita por aumentar o seu palmarés. “Temos que vivir todas con esa presión”, aseguraba, ao que engadiu que “pero que bonito é chegar a unha final así e máis na casa”.
Sen dúbida, xogar en casa e coa calor do seu propio público é un punto a favor, pero para o técnico “o nivel anímico de cada equipo vai ser fundamental nesta final”.
Nel influirá a presencia da afección, xa que, en palabras de Peque, “a afección do Burela é a mellor que pode acompañarnos nesta viaxe e é o último título que nos falta por brindarlles en casa. Imos dar o 100%”.
