O Viaxes Amarelle FSF prepárase para un encontro vital. Será o vindeiro domingo ás 13.00 horas en Leganés. O cadro coruñés, que adestra Raúl Castro Piru, leva días pensando neste choque despois do desastre sufrido no seu propio feudo na última xornada, onde perdeu por 1-10 diante o Atlético Torcal.
Nese momento acendéronse todas as luces de alarma debido a que, o empate do ENCE Marín Futsal fronte a FSF Castro Bloques Cando achegaba as prazas de descenso a apenas 4 puntos.
A serie de resultados do Viaxes Amarelle FSF é mala en xogo, sensacións e resultados, e a preocupación rolda a cabeza do seu técnico, Raúl Castro Piru: “Vimos de facer as cousas mal. É certo que estamos a pagar moi caros os nosos fallos, pero o certo é os fallos existen e moitos son graves. Non podemos ofrecer tantas facilidades aos nosos rivais”, comenta o técnico das coruñesas.
O choque diante do Leganés é importante porque o ENCE Marín Futsal está a axexar ás herculinas e só cabe a vitoria.
As madrileñas son o faroliño vermello da táboa e só gañaron un encontro, precisamente na última xornada. O Leganés é un clásico da categoría pero que foi a menos.
“Si, veñen de conseguir a súa primeira vitoria da tempada e quererán referendar ese bo resultado, pero non cabe dúbida de que somos superiores e debemos traernos os tres puntos. Pola nosa mente non pasa outra cousa que a vitoria”, manifestaba na previa do encontro Raúl Castro Piru.
Para este encontro, o técnico madrileño do Viaxes Amarelle FSF poderá contar con todas as súas xogadoras.
A internacional nipona Suto Yuria adestra co Viaxes Amarelle FSF
Nos últimos días, a porteira da selección xaponesa, Suto Yuria, estívose exercitando coas coruñesas e o ambiente foi positivo.
Parte do traballo destas sesións foi psicolóxico, tentando que as xogadoras estean centradas ao máximo, pero sen presión engadida. “Elas saben o que está en xogo, manter a categoría é vital para nós, pero a miña misión é mentalizalas e preparalas ao máximo para que xoguen sen sentirse coas mans atadas, con confianza. Confío en que logremos a vitoria contra Leganés con bo fútbol e boas sensacións”, concluíu o adestrador Raúl Castro Piru.
Ver esta publicación en Instagram
