- A Deputación da Coruña apoia con 1 millón de euros a 128 clubs deportivos da provincia coruñesa que participan en competicións de ámbito nacional e internacional
A resolución provisional deste programa de apoio ao deporte coruñés, publicada hoxe no Boletín Oficial da Provincia, beneficia a un total de 128 clubs coruñeses masculinos e femininos de diferentes especialidades deportivas (fútbol, baloncesto, atletismo, balomán, rugby, natación, piragüismo, remo, ciclismo, voleibol, hockey, ximnasia, judo, taekwondo…) que participan en competicións deportivas do máis alto nivel.
Outras sete axudas, por importe de 34.098 euros, están condicionadas á achega de documentación complementaria, segundo apuntan desde a Deputación da Coruña.
Entre as subvencións de maior importe destacan as do Club Viaxes Amarelle de fútbol sala feminino (37.005 €), que participan na primeira división nacional, a Escola Basket Xiria (30.865 €) e o Club Baloncesto Culleredo (30.865 €) que participan na Liga EBA de baloncesto, a S.D. Compostela (25.339 €), que participa na 2ª División RFEF masculina ou O Parrulo Fútbol Sala (23.190 €), que participa na 2ª División da liga de fútbol sala, o Club Maristas Coruña da Liga Femenina 2 de baloncesto (25.339,58 €), o Club Victoria de Santiago de Compostela feminino de fútbol que milita na 3ª RFEF (23.743,18 €), o Fútbol Club Meigas, que participa na Segunda División Nacional de Fútbol Sala feminino (23.190,58 €) ou o Hockey Club Coruña Feminino que compite na Ok Liga Iberdrola, máxima competición estatal, (18.420,00 €).
O deputado de Deportes, Antonio Leira Piñeiro, destacou a “importante contribución deste programa para apoiar aos principais equipos do deporte coruñés e situalos á vangarda do deporte nacional”.
