Esta fin de semana dispútase a 24ª xornada da Primera Iberdrola do fútbol sala estatal. Dos 16 equipos que militan nesta competición, a máxima categoría do futsalfem español, seis son galegos. Cada un deles está inmerso nunha situación diferente nesta recta final da competición de liga neste curso 2023-24.
Hai por diante pouco máis de media ducia de partidos para a medida ducia de equipos galegos que xogan na máxima categoría do fútbol sala español e cada quen está nunha posición diferente, con aspiracións distintas e retos dispares. Estamos na xornada 24 dunha liga regular con 30 encontros. Restan, polo tanto, sete partidos.
Dous deles xogan por entrar no play-off que dará dereito a loitar polo título de Liga nesta Primera Iberdrola de fútbol sala. É o caso do Pescados Rubén Burela, o único que neste momento se sitúa en postos de play-off. De feito, as Guerreiras Laranxas son líderes da competición con 65 puntos. Teñen asegurada unha das catro prazas que dan dereito a estar nesa final a catro polo entorchado ligueiro. Un trofeo que o Pescados Rubén Burela sabe o que é erguer en non poucas ocasións. Sen ir máis lonxe son as actuais campioas.
Un equipo galego en postos de descenso
O rival desta xornada das Guerreiras Laranxas é o ENCE Marín Futsal que xusto é o único equipo galego que ocupa postos de descenso. É dicir, nesta xornada o duelo de rivalidade da nosa terra mide ás futbolistas galegas en postos de play-off contra as futbolistas galegas en postos de descenso. O cumio e a zona baixa da clasificación estarán fronte a fronte. Será o sábado 6 de abril a partir das 17:00 horas.
O ENCE Marín Futsal acaba de disputar a final da Copa Galicia na que caeu derrotado co Poio Pescamar. Pero as conserveiras tiveron que loitar moito para vencer o derbi da ría. Chegouse á prorroga e as vermellas levaron o título grazas a un gol nese tempo extra.
Na Liga o ENCE Marín Futsal é 14º na clasificación. Logo de xogarse 23 partidos atesora 16 puntos no seu haber froito de 4 triunfos e outros tantos empates. Suma 15 partidos perdidos. Na xornada previa empataba en Castro de Rei co FSF Castro Bloques Cando (2-2). Na anterior vencía 6-1 nada menos que ao Arriva Alcorcón que está loitando polo play-off. Non perde desde a xornada 21 na que caeu na súa propia casa 4-7 co LBTL Futsal Alcantarilla.
O ENCE Marín Futsal leva na zona baixa da táboa toda a campaña. Meteuse en postos de descenso na xornada 9 e xa non saíu do pozo. Estos últimos resultados son esperanzadoras para as futbolistas que prepara Ramiro Díaz.
Agora mesmo as de Marín están a tres puntos da salvación e quedan sete partidos por disputar, así que todo é posible. Eso si, quen está a eses tres puntos por encima das mariñenses no primeiro posto que se libra da perda de categoría é outro galego: o Viaxes Amarelle FSF.
As conserveiras do Poio Pescamar queren loitar polo título
O Poio Pescamar, que acaba de facerse coa Copa Galicia de futsalfem precisamente ante o ENCE Marín FutSal, é un dos aspirantes a meterse no play-off polo título.
As conserveiras son quintas empatadas a 45 puntos co Arriva Alcorcón (que fai o corte neste momento dos equipos que entrarán na fase final polo título). O Poio Pescamar está nun momento doce de resultados. Acumula sete triunfos consecutivos.
O conxunto vermello enfróntase nesta xornada co Nueces de Ronda At. Torcal que é 11º empatado a 27 puntos co FSF Castro Bloques Cando. As futbolistas que adestra Luis López-Tulla queren manter a serie de resultados positivos e continuar escalando para loitar polo máis grande esta tempada.
Con todo, o Nueces de Ronda At. Torcal é tamén un equipo que está nun bo momento. Catro partidos seguidos sumando de tres permitíronlles poñer terra de por medio cos postos difíciles da competición. Polo que non llelo porán doado ás galegas.
O Viaxes Amarelle FSF, na corda frouxa
As coruñesas do Viaxes Amarelle FSF fan a linde cos postos de descenso. O conxunto que adestra Piru acaba de recibir unha goleada do Nueces de Ronda At. Torcal. Nada menos que un 1-10 no pavillón da Sagrada Familia da cidade herculina. Un mazazo para a moral das laranxas. O certo é que o conxunto do Viaxes Amarelle FSF non está a atravesar un bo momento de xogo nin de resultados.
As coruñesas non puntúan desde a xornada 18ª cando se impoñían como locais ao Rayo Majadahonda AFAR 4 FSF por 6-3. Levan boa parte do curso rondando a zona de perigo. Esta xornada o Viaxes Amarelle FSF visita a pista do Leganés. Será o domingo a partir das 13:00 horas.
O adestrador das coruñesas, Raúl Castro Piru, é consciente da situación do bloque que prepara: “Vimos de facer as cousas mal. É certo que estamos pagando moi caros os nosos erros, pero o certo é que os erros existen, son moitos e son graves. Non podemos poñerllo tan doado aos nosos rivais”.
Piru, adestrador do Viaxes Amarelle FSF: “Vimos de facer as cousas mal. É certo que estamos pagando moi caros os nosos erros, pero o certo é que os erros existen, son moitos e son graves. Non podemos poñerllo tan doado aos nosos rivais”
Castro de Rei quere seguir cun equipo na elite do fútbol sala
O FSF Castro Bloques Cando xoga por vez primera na elite do futsalfem estatal. A súa chegada á máxima categoría foi tremendamente meritoria. Un auténtico milagre para un concello pequeno como é Castro de Rei, con pouco máis de 5.000 habitantes. Á fronte deste club da Terra Chá hai anos que está como presidenta Carmen Tojo. No banco, un adestrador con anos de futsal nas costas, José Carlos Martín Rodríguez Chipi
Agora mesmo o FSF Castro Bloques Cando ocupa a 12ª posición da táboa, é dicir, está xusto encima do Viaxes Amarelle FSF e do ENCE Marín Futsal. Pero as lucenses teñen 8 puntos de vantaxe coas herculinas e 11 coas de Marín. Calquera cousa pode pasar na media ducia de partidos que hai por diante nos hai en xogo 21 puntos.
Nesta xornada reciben o sábado ás 11:00 horas ao Arriva Alcorcón. Un oso duro de roer. Son as cuartas clasificadas. Ocupan polo tanto postos de play-off. A última vez que gañaron foi na xornada 19 co Levante. Na xornada 23 conseguiron un empate (2-2) contra o ENCE Marín Futsal, rival directo por salvar a categoría.
Ourense OnTime, na zona morna
As ourensás ocupan a 9ª posición con 34 puntos. Están na zona morna da clasificación, pero tampouco teñen nada seguro por moito que a súa situación semelle máis cómoda.
As matemáticas din que todo é posible, por arriba e por abaixo. A lóxica indica que ás futbolistas que adestra Raquel Mondoruza non pasarán apuros, pero tamén que teñen complicado aspirar ao play-off.
