O Pescados Rubén Burela exerce de anfitrión da Supercopa en Vista Alegre onde recibirá ás vermellas do Poio Pescamar. O partido terá lugar o sábado 9 de xaneiro a partir das 12:00 horas. Esta gran final do futsalfem estatal con acento galego vai ser transmitida por Teledeporte.
Burela e Poio. Poio e Burela, dous equipos galegos no máis alto do futsal estatal que están condeados a verse as caras en finais e loitar por entorchados que, pase o que pase, quedan en Galicia. Unha doce condea a que teñen ambas as dúas escuadras que nesta fin de semana deberán repetir un enfrontamento que hai ben pouco que levaron acabo. Se daquela foi a Copa da Raíña o trofeo polo que loitaba, o título en xogo nesta ocasión é a Supercopa de España correspondente ao ano 2020. Naquel partido venceu o Burela. O guión desta nova final está en branco.
O Poio Pescamar ven de quedar eliminado na Copa da Raíña do presente curso. O Ourense Envialia apeou do torneo do KO as subcampioas que terán máis ansia de vencer se cabe logo dese golpe. Ourensás e poienses empataban a 3 goles. Nin a prórroga foi quen de desfacer as táboas. E desde o punto de penalti as de Morenín conseguiron ser merecedoras do pase á fase final. O Poio Pescamar chegará á Mariña adoecendo por se levar o trofeo para desquitarse da final de Copa que xogou ante o Burela e tamén da eliminación que acaba de sufrir diante do Envialia.
Para a familia laranxa será un día histórico. O Pescados Rubén Burela gozará dun sábado con dobre título en xogo: feminino e masculino. A xornada abrirase en Vista Alegre como flamante sede da Supercopa de España co duelo irmandiño entre as Guerreiras Laranxase o Poio Pescamar. Pola tarde, ás 17.00 horas (TVG2), os pupilos do Mariskal saltarán á pista de Narón para pelexar pola súa segunda Copa Galicia ante o Noia Portus Apostoli. Unha festa non só para a Familia Laranxa senón para o fútbol sala galego.
Jozi, porteira do Pescados Rubén Burela: “Será un día moi bonito, estamos todos moi ilusionados”
“Será un día moi bonito, con dobre reto de título por diante. Estamos todos moi ilusionados”, explicaba a Jozi, que sabe moi ben o que significa gañalo todo co Pescados Rubén Burela FS nestas once tempadas defendendo a rede mariñá.
O Burela soña coa súa terceira Supercopa
Jozi, que xa puido estremecerse, soñar e vibrar co grande ambiente de final no mausoleo laranxa tanto en Copa de España como en Copa da Raíña, pelexará nesta ocasión pola terceira Supercopa para a vitrina do Pescados Rubén Burela.
A porteira das Guerreiras Laranxas explicaba: “É un desexo feito realidade, volver pelexar por un título en Burela. Por segunda vez na nosa historia, despois de 2012-13, temos a oportunidade de conseguir un triplete”.
Jozi, porteira do Pescados Rubén Burela: “É un desexo feito realidade, volver pelexar por un título en Burela. Por segunda vez na nosa historia, despois de 2012-13, temos a oportunidade de conseguir un triplete”
“Oxalá este ano quede na casa e oxalá poidamos contar con público” explicaba emocionada a brasileira ante unha cita que repetirá o elenco e protagonismo do Martín Carpena. Naquel encontro Guerreiras Laranxas revalidaron o título da Copa da Raíña. Foi hai tan só unhas semanas diante do mesmo rival co que medirán forzas esta fin de semana. Daquela impuxéronse as da Mariña grazas aun resultado axustado: 1-0.
Na opinión da cancerbeira Jozi: “Poio Pescamar virá con moitas ganas de xogar e de desquite. Será a súa segunda final por un título. Nós tamén estamos moi ilusionadas e sobre todo enchufadas para defender o noso trono e poder conseguir a terceira Supercopa”.
