A décimo quinta xornada de Liga Feminina 2 chega cargada de duelos galegos. Entre deles o que medirá en Pontevedra o CB Arxil e o Maristas Coruña. Será no pavillón do CGTD o próximo sábado, 9 de xaneiro, ás 19:30 horas.
Cunha traxectoria moi parella, pontevedresas e coruñesas chegan separadas por tres puntos na clasificación, tendo o Arxil 15 e o Maristas 18 e con dous partidos máis as herculinas.
O Arxil quere reforzarse na casa
As xogadoras locais veñen dunha derrota contra o BAXI Ferrol, o mellor equipo da categoría, pero que sufriu para lograr sumar os dous puntos. O equipo dirixido por Maite Méndez logrou por primeira vez na Malata levarse a vitoria nun cuarto, obrigando ás invictas da LF2 a loitar pola remontada.
As de verde sufriron unha derrota que non debe minar a confianza en si mesmas, xa que lograron realizar un partido moi digno ante un conxunto de nivel superior.
Ademais, este partido será o primeiro que xoguen este ano na casa, onde consumaron a súa última vitoria, ante a ADBA o pasado 12 de decembro, cun 69-55.
Entre as outras dúas vitorias que conseguiu esta tempada, e que as sitúan na penúltima posición actualmente, unha delas foi tamén no CGTD ante o Ulla Oil Rosalía.
A outra foi contra o propio Maristas, na pista das coruñesas, onde se impuxeron por un 67-73. Aquel encontro foi un tira e afloxa entre ambos conxuntos, que alternábanse no marcador, ata que finalmente as pontevedresas foron máis fortes e venceron.
O Maristas comeza a ver a luz ao final do túnel
Pola súa parte, as herculinas deberán darlle a volta ao resultado da primeira volta se queren ter opcións de manterse na LF2. O seu último partido, un trunfo ante o Ulla Oil Rosalía, foi o primeiro que venceron despois de seis duelos sen coñecer a vitoria.
De gañar ao Arxil, as coruñesas sumarían dous puntos vitais para deixar atrás dunha vez por todas as malas sensacións de tantas semanas sen vitorias. Ademais, permitiríalles alonxarse da cola da clasificación, onde ocupan a décima posición, a seis puntos do colista.
Para logralo, apoiaranse en xogadoras que foron clave no último encontro como Eugenia Filgueira (segunda mellor valorada do partido) ou Andrea Pérez (entre as máximas anotadoras e mellor valoradas da categoría).
O Arxil sorteará entradas entre as persoas aboadas para o partido ante o Maristas
