A LF2 vive esta xornada un duelo de rivalidade galego con moito en xogo. O Maristas Coruña recibe ao Mariscos Antón Cortegada. As herculinas e as de Vilagarcía de Arousa están inmersas na loita por conseguir meterse entre as cinco primeiras prazas que son as que permiten acceder á fase de ascenso á Liga Challenge. Quen xa está neses postos de privilexio é o CB Arxil que se sitúa no terceiro lugar da táboa clasificatoria.
Nesta xornada 24ª da LF2 enfróntanse o Maristas Coruña e o Mariscos Antón Cortegada hoxe, sábado 30 de marzo a partir das 18:00 horas. Será no Colexio Maristas da Coruña con arbitraxe de Andrés Esteban Domínguez e Julián Rico.
¡¡MAÑANA NOS VEMOS!! 💪🏼😊
⏰18:00
📍Polideportivo Maristas#VAMOSMARISTAS #ELSUEÑOCONTINÚA pic.twitter.com/30YU2ZpX8R— Club Maristas Coruña (@MaristasCoruna) March 29, 2024
As locais parten por diante na clasificación. Son quintas cun partido menos e unha vitoria máis que as de Vilagarcía de Arousa.
En caso de triunfo para o equipo do Maristas Coruña que adestra o técnico Fernando Buendía, as da Coruña terían asegurado matematicamente o seu lugar na fase de ascenso á Liga Challenge. Pero non parece que as pontevedresas vaian poñerllo doado ás da Coruña. Saben que boa parte das súas opcións de estar nesa fase pasan por vencer na cidade da Torre de Hércules.
Ver esta publicación en Instagram
A outra bala das de Vilagarcía de Arousa pasa por que perda o cuarto clasificado, o León, que xoga en Avilés. Mariscos Antón Cortegada que adestra Álvaro Fernández está un punto por debaixo das leonesas (37 vs 36). O cruce entre ADBA Sanfer asturiano e o Mipelletymas BF León podería asegurar ás leonesas un sitio na ansiada fase de ascenso.
Na xornada previa o Mariscos Antón Cortegada vencía ao GEIEG 71-65, mentres que o Maristas Coruña perdía en Plasencia co Hierros Díaz Miralvalle por un tanteo de 67-53.
Na primeira volta da competición nesta Liga Femenina 2, na pista do Mariscos Antón Cortegada, as herculinas vencían por un marcador de 41-53.
O CB Arxil recibe ao Mataró con bos números
Ubicado nunha cómoda terceira praza o CB Arxil recibe ao Homs UE Mataró tamén hoxe pero a partir das 17:00 horas e o fan como locais.
As galegas teñen seis puntos máis que as súas rivais que son oitavas. Levan unha serie de cinco vitorias. O partido dispútase no Pabelón do CGTD (Estadio da Xuventude) de Pontevedra coa arbitraxe de Elio Clavería Sánchez e Iris Díaz Feijóo.
Segundo lembran desde o club o Club Baloncesto Arxil é “o segundo equipo que máis tira de dous con 988 só por detrás do líder o Segle XXI con 1.071, é tamén o segundo equipo que tira tiros libres 582 por detrás de Maristas Coruña, é o terceiro que mais rebotes colle con 893, é o terceiro que mais rebotes colle en defensa, e ademais é o segundo en rebotes de ataque”.
Salientan desde a entidade verde tamén a profundidade do banco dado que a adestradora do equipo pontevedreés, Maite Méndez, ten empregado até o momento un total de 13 xogadoras neste curso.
Xornada 24ª no Grupo A da LF2
- Club Baloncesto Arxil vs Homs UE Mataró (S-17:00h) | Canal FEB.tv
- Maristas Coruña vs Mariscos Antón Cortegada (S-18:00h) | Canal FEB.tv
- GEiEG vs Segle XXI (S-18:15h) | Canal FEB.tv
- Magec Tías CLVDG vs Hierros Díaz Miralvalle (S-19:00h) * | Canal FEB.tv
- ADBA Sanfer vs Mypelletymas BF León (S-20:00h) | Canal FEB.tv
- Náutico Tenerife Universidad de La Laguna vs Tenerife La Laguna (D-12:00h) * | Canal FEB.tv
- Ponce Ginemedica vs Westfield Glories Barna (D-13:00h) | Canal FEB.tv
(*) Horario local
