A medida que avanza a competición, gañar faise cada vez máis necesario para os conxuntos da parte baixa da Liga Feminina 2. Desta vez, as xogadoras do CB Arxil consegueron o seu obxectivo: lograron sumar os dous puntos despois de tres derrotas consecutivas que amenazaban con deixalas atrapadas na segunda metade da táboa. Porén, a sorte segue sen acompañar ás santiaguesas do Ulla Oil Rosalía, que acumulan unha derrota máis e continúan durante outra xornada como colistas.
O duelo galego, que foi adiado polo illamento do Rosalía, corresponde á cuarta xornada e disputouse en terreo compostelán. As locais esperaban que o xogar na casa, aínda que sen público, lles axudaría a saír da zona de descenso. Non foi así. O Arxil foi superior durante todo o partido, dominando en todos os parciais agás o último.
O Arxil marcou o ritmo do xogo
As xogadoras de Mayte Méndez impuxeron o seu ritmo de partido desde o inicio. O CB Arxil asinou un primeiro parcial 15-18 grazas ao bo xogo de Noelia Masía, a xogadora mellor valorada e autora de 11 puntos neste tempo. O segundo parcial serviu para confirmar a superioridade das visitantes, xa que o Rosalía non conseguía levantar cabeza e foise ao descanso cun 23-31 en contra.
Á volta do descanso as pontevedresas chegaron moi enchufadas e sentenciaron o partido. O terceiro cuarto aumentou a diferencia entre o Rosalía e o Arxil cun marcador 6-10. No último tempo as xogadoras de Chiqui Barros comezaron a reaccionar e conseguiron un resultado igualado. Pero xa era tarde; os dous puntos marcharon a Pontevedra e o Rosalía terá que preparar ben o próximo encontro para sobrevivir na Liga.
FICHA TÉCNICA
41) ULLA OIL ROSALÍA: Carla García (2), Blanca Manivesa (2), Sara Corredoira (7), Ángela González (10), Leticia Soares (6) -quinteto inicial-. Tamén xogaron: Ana de Matías (-), P. Rivas (-), Nuria Choren (9), Alba Rama (-), Clara Riera (-), Nerea Liste (9).
59) CB ARXIL: C. Fernández (5), N Masia (16), M. Lago (8), C. Díaz (4), H. Forster (2) -cinco inicial-. Tamén xogaron: V. Crespo (-), A. Vázquez (-), N. Casalderrey (-), M. Moreira (5), N. López (2), B. Ndoye (8), S. Castro (9).
PARCIAIS: 15-18, 8-13, 6-16 e 12-12
ÁRBITROS: Jorge González e Álvaro Cubelo.
INCIDENCIAS: Partido correspondente á sétima xornada da Liga Feminina 2 disputado no Instituto Rosalía de Castro a porta pechada.
