O día de Reis celebrábase na LF2 cun duelo galego enfrontando ao Maristas Coruña e ao Ulla Oil Rosalía na pista das coruñesas, onde quedaron os dous puntos tras un partido no que as santiaguesas foron de máis a menos, cun resultado final de 65-59.
Ambos equipos chegaban necesitados dunha vitoria para deixar atrás as súas respectivas rachas de derrotas. Ademais, xa se prevía un encontro igualado, xa que no partido de ida (celebrado en decembro ao ter sido adiado) o Rosalía impúxose por unha diferenza de 16 puntos.
O Maristas deulle a volta ao partido, tras un primeiro cuarto de 10 do Rosalía
O partido comezou cuns primeiros dez minutos excelentes do plantel dirixido por Chiqui Barros. As de Santiago non perdoaban fronte ao aro e facíanse completamente co control do partido, anotando canastra tras canastra e un triple a dos segundos do final. Con especial acerto estivo Leticia Soares, que asinou 13 dos 25 puntos do seu equipo.
Todo cambiou no segundo cuarto, cando o cadro de Jorge Carreira reaccionou iniciando a remontada e tomando as riendas do duelo provincial.
Poñendo o foco en frear a Soares, as coruñesas deron coa fórmula para impedir o xogo compostelán. Ademais, as boas xogadas de ataque de Laura Cervelo e de Joana Pereira lograron que as herculinas comezasen a facerse co partido en casa. Neste segundo parcial os roles cambiaronse por completo entre os dous equipos, de maneira que o Maristas achegábase ao empate, co 26-27 para o descanso.
O mal xogo do segundo cuarto castigou por compleo ao Rosalía, que na segunda metade do partido seguiu loitando, pero perdeu toda vantaxe que acadara no primeiro parcial.
Tras o paso por vestiarios, o duelo convertiuse nun pulso entre ambos equipos. O acerto desde a liña de tres aumentaba a distancia das coruñesas, mentres que as compostelás vían como se lles escapaba o partido. Con cinco triples en dez minutos, o Maristas adiantábase cun 45-43 no electrónico.
Para os dez minutos finais, aínda que o resultado seguía aberto, as xogadoras do Rosalía non atoparon a fórmula para gañar. As herculinas lograron un parcial 7-0 e nove puntos de vantaxe, que tiveron resposta en Soares e as súas compañeiras, aínda que non o suficiente para retomar o control.
Así, o Maristas afianzou a súa vitoria, superando ao rival por sete puntos. Este trunfo remata coa racha de seis derrotas consecutivas que arrastraban as xogadoras de Carreira, mentres que suma a cuarta derrota para as de Barros.
Malia a derrota, a mellor xogadora da cita estivo no bando das visitantes. Leticia Soares cargou co peso do seu equipo, logrando 25 puntos dos 59 anotados e tres rebotes, que lle mereceron 27 créditos valorativos.
Tamén estivo moi acertada Eugenia Filgueira no lado local. A xogadora do Maristas asinou 13 puntos e oito rebotes, acadando 18 puntos de valoración.
Coruñesas e compostelás repiten duelo galego na seguinte xornada
Esta fin de semana, tanto Maristas Coruña como Ulla Oil Rosalía terán de novo un rival galego enfronte. As coruñesas visitarán ao CB Arxil o próximo sábado, ás 19:30 horas, nunha loita entre dous equipos que queren evitar o descenso.
Pola súa parte, as de Santiago recibirán ao Celta Zorka Recalvi o mesmo día, pero ás 17:00 horas, nun partido de forzas desiguais pero no que as locais intentarán dar a sorpresa ante un dos grandes da competición.
FICHA TÉCNICA
65) MARISTAS CORUÑA: Martínez (-), Casal (11), Filgueira (13) e Cervelo (7) e Andrea Pérez (7) -cinco inicial-. Tamén xogaron: Cortés (-), Joana Pereira (17), Feijoo (2), Galán (-), Ruiz (-) e Hughes (8).
59) ULLA OIL ROSALÍA: Ana de Matías (-), Carla García (7), Chorén (9), Corredoira (14) e Soares (25) -cinco inicial-. Tamén xogaron: Rivas (-), Maniviesa (-), Ángela González (-), Clara Riera (2), Nerea Liste (2) e Carro (-).
PARCIAIS: 12-25, 14-2, 19-16 e 20-16.
ÁRBITROS: Adrián Álvarez e Daniel López.
INCIDENCIAS: Partido correspondente á 14ª xornada da Liga Feminina 2 disputado no Colexio Maristas (A Coruña).
