O III Rallye de Pontevedra Memorial Miguel Álvarez rematou co Melmac Rally Factory como campión do Open Gadis Donas. O vehículo conducido por Ruth Ortega e copilotado por Lorena Romero foi o único enteiramente feminino en finalizar a proba.
A propia piloto recorda como a competición foi “súper complicada, saímos con problemas mecánicos todo o sábado, pero ao final conseguimos auguantar sen ter que abandoar e conseguimos a primeira posición do trofeo Donas. Ao final do Rally xa estabamos nos tempos dos compañeiros do Volante FGA e a Beka PXP21“.
O circuíto pontevedrés viviu unha edición de claros e escuros. A participación foi todo un éxito, con máis de 150 pilotos inscritos, un récord no Campionato Galego. Porén, houbo que lamentar o pasamento do piloto pontevedrés Víctor Magariños, falecido mentres facía o recoñecemento do rally.
O Pontevedra 1984 Team aumenta a presenza feminina
Na táboa clasificatoria final, o vehículo do Melmac Rally Factoy finalizou na 73ª posición, cun tempo de 1h25:40.250. Porén, as compoñentes deste equipo non foron as únicas mulleres en finalizar a proba, con ampla presenza do Pontevedra 1984 Team.
Outras once deportistas, todas elas copilotos ao ser Ruth Ortega a única piloto feminina, tamén completaron o circuíto do Rallye de Pontevedra. A mellor posicionada foi Bárbara Gómez, copiloto do Desguaces Tino Racing, equipo que rematou undécimo cun tempo de 1h09:46.421.
Seguiuna, xa na 19ª posición, Carmen González Montenegro, copiloto do Carracedo Competición, cunha marca de 1h11:40.800. A seguinte clasificada foi Lara Gómez, copiloto do Cuntis VT, na 26ª praza, completando o circuíto en 1h12:45.016.
A continuación Lucía González, copiloto do Galicia Motorsport, foi 29ª, cun tempo de 1h13:19.385. Catro postos por debaixo rematou María Teresa López, copiloto do Lalín Deza, nun tempo de 1h13:45.266.
Seguidamente, Rosa Piñeiro, copiloto do Pontevedra 1984 Team, foi 54ª, cunha marca de 1h18:08.024. Unhas posicións por debaixo, na 58ª praza, quedou Patricia Rodríguez Centeno, do Surco, finalizando en 1h18:53.972. Moi preto dela quedou Jessica Piñeiro, do Galicia Motosport, no 60º posto, rematando en 1h19:42.766. Xa na 69ª posición clasificouse Beatriz Martínez, do Pontevedra 1984 Team, rematando en 1h23:48.719.
Por debaixo das competidoras do Melmac Rally Factory quedaron Pilar Medina, do SD Medigo, clasificada como 73ª e Susana Cal, do Pontevedra 1984 Team, na 76ª posición.
Podes consultar nesta ligazón a clasificación final da proba pontevedresa.
O Melmac Rally Factory segue evolucionando
Entre os abandonos, estivo o coche pilotado por Leti López, con María Martínez como copiloto, dentro da escudería do Melmac Rally Factory. Porén, este vehículo conforma xa o seu propio equipo. Tal e como explica Ruth Ortega: “Queríamos botarlle unha man para empezar, pero xa cada unha segue por separado”.
Agora, Leti López conta cun equipo “máis familia”, no que o seu pai e o seu irmán están involucrados nas asistencias. Ortega apunta que “nós seguiremos co equipo feminino sen dúbida, e seguiremos axudando ás mozas que se animen a comezar”.
A seguinte cita para Ruth Ortega e as súas compañeiras terá lugar entre o 9 e o 10 de xullo en Salvaterra do Miño, no 17º Rally Sur do Condado.
Ruth Ortega: “Non está tan normalizado que compitan mulleres”
