A Federación Galega de Automobilismo vén de anular a todos os efectos a 2ª Copa Gadis-Pecado Original 2022 do Open Donas, a competición feminina galega. A organización toma esta decisión en resposta á polémica xurdida polos premios establecidos inicialmente.
Nun comunicado emitido este luns, día 13, a Federación anunciaba que as gañadoras obterían uns “conxuntos de roupa interior ‘Modelo Federación’ para usar debaixo do mono de competición”. O anuncio levantou a crispación de competidoras e afeccionados.
O equipo feminino Melmac Rally Factory criticou nas súas redes a elección do premio, que consideraron “unha falta de respeto hacia a muller neste deporte”.
Nun novo escrito realizado hoxe, ao que tivo acceso As Nosas, a Federación Galega de Automobilismo anuncia que “ante a polémica xurdida co premio”, que definen como “roupa deportiva feminina de calidade e ignífuga e polo tanto apta para a práctica do automobilismo deportivo e outros deportes”, deciden anular a Copa Gadis-Pecado Original 2022.
Ruth Ortega (pilota de rallye): “É unha falta de respecto ás mulleres”
Así mesmo, desde a organización insisten en que “a búsqueda de patrocinios para as diferentes probas de copas dos Campionatos Galegos ten como finalidade que os/as deportistas participantes nas mesmas poidan obter premios económicos ou en especie que poidan resultarlle de utilidade na práctica do Automobilismo Deportivo”. Por último, explican que a decisión de anular a proba prodúcese tras escoitar “os/as deportistas, que son os que, no seu caso, se deberían beneficiar da Copa”.
Gadis desmárcase da proba
Outra das respostas que deixa a polémica suscitada polos premios da Federación Galega de Automobilismo, vén doutro dos patrocinadores. A cadea de supermercados Gadis, fixo público nun tuit que “nos desmarcamos totalmente da organización desta proba, así como dos agasallos da mesma”.
Dentro do noso programa de RSC temos unha colaboración puntual coa FGA, como con outras iniciativas de apoio ó deporte.
Desmarcámonos totalmente da organización desta proba, así como dos agasallos da mesma. Sentimos unha grande repulsa ante o ataque contra a dignidade da muller.— Gadis (@gadis) December 14, 2021
Tal e como adiantou a TVG en Twitter, Renova FGA, un grupo de traballo de oposición á actual directiva da Federación Galega de Automobilismo, tamén criticou publicamente a decisión de outorgar roupa interior como premio na competición.
🏎️ Críticas tamén desde @renovafga
🎙️“Tan só dous días depois do seu retorno á presidencia da FGA, Iván Corral volve amosar a súa verdadeira cara e os motivos polos que, máis ca nunca, é preciso un cambio de rumbo na Federación Galega de Automobilismo”
— En Xogo tvG2 (@EnXogo_tvG2) December 14, 2021
Nun comunicado publicado na súa web, a integrante Andrea Lamas declara que “en pleno século XXI é inadmisible que unha federación deportiva, en lugar de promover a igualdade nun deporte no que as mulleres pouco a pouco, e con moito esforzo, estamos a abrirnos camiño, o que faga sexa lanzar unha iniciativa sexista e retrógrada”.
