A decisión da Federación Galega de Automobilismo de regalar un conxunto de roupa interior ás gañadoras do Open Donas primeiro, e de anular a competición despois ante o descontento xerado, indigna a deportistas como Ruth Ortega.
A pilota do Melmac Rally Factory asegura a As Nosas que ese galardón “é unha falta de respecto ás mulleres”. A deportista explica que en ningún momento o equipo foi contactado pola federación e que, malia non estar na competición desde hai unhas semanas, este asunto “incúmbeme porque denigra á muller”.
A Federación Galega de Automobilismo anula o 2º Open Donas tras a polémica co premio
A problemática xurdida coa proba afecta ao automobilismo feminino en Galicia. Tal e como sinala Ortega, “Gadis, que era o maior patrocinador do Open Gadis Donas, resulta que rompeu o contrato coa Federación e xa non vai ser patrocinador porque lle parece unha falta de respecto ás mulleres o que fixeron. Imaxino que de aí vén que cancelaran o trofeo, porque agora non hai patrocinador. Por facer isto perderon un patrocinador, perdeuse o trofeo e irá a máis”.
Preguntada por se é habitual ver este tipo de premios nas probas masculinas, a deportista asegura rotundamente que “xamais. Dan material e o típico, no campionato de España se corrías en Arzúa por exemplo dábanche o trofeo e un queso, o típico de alí, pero a homes e mulleres. É como se agora ao gañador da FGA lle dan un calzón. Véxoo absurdo”, apunta.
Ruth Ortega: “É como se agora ao gañador da FGA lle dan un calzón. Véxoo absurdo”
Nun segundo comunicado, a Federación Galega de Automobilismo fai referencia a roupa ignífuga en lugar de roupa interior, o primeiro razoamento que pasou pola cabeza de Ruth Ortega: “Eu realmente ao principio díxenlle á xente que agardase a unha explicación, porque ao mellor explicáranse mal. É certo que moitas veces á roupa ignífuga chámanlle roupa interior, entón eu quixen pensar iso, que ían regalar un conxunto, igual que regalan unhas rodas, pois un conxunto de roupa ignífuga, que está moi ben. Pero non. Enlazando que o patrocinador é fabricante de lencería e que a Federación quitou o primeiro comunicado, se fora ignífuga, a Federación faría un comunicado explicándoo. Pero foi todo o contrario”.
Ruth Ortega: “Moitas veces á roupa ignífuga chámanlle roupa interior, entón eu quixen pensar iso. Pero non”
Esta era a única competición integramente feminina que se celebraba en Galicia. A pilota explica que, como en cada deporte, “adoita a haber unha categoría feminina”. No mundo do automobilismo isto tamén é a norma, aínda que a Galicia non chegou ata hai dous anos, coa primeira edición do torno.
Ruth Ortega: “Non está tan normalizado que compitan mulleres”
“Fóra de Galicia hai trofeos femininos nacionais e noutras comunidades. Isto é un trofeo que dan, é algo simbólico, algo de promoción. Eu cando apoiei este movemento foi para dar ánimos ás mulleres a que se sentiran apoiadas polo resto das mozas e que non estaban soas, que se animaran. A min se me quitan o trofeo, tampouco me van fastidiar”, apunta Ortega.
“Dos erros tamén se ten que aprender e teñen que saber que se equivocaron”, resume a pilota.
Desde As Nosas contactouse tamén coa Federación, que deu como resposta o comunicado emitido este martes e que se pode ler nesta ligazón.
