- Jesús López, presidente do Atlético Guardés declaraba: “Queremos seguir sendo unha referencia en España”.
- O auditorio de San Benito volveu ser escenario da presentación, que contou cunha nutrida presenza de afeccionados para desexar sorte ao equipo.
Outro ano máis, o Mecalia Atlético Guardés dixo ola a todo o mundo no auditorio de San Benito. Alí, xunto aos seus afeccionados, presentouse en sociedade o club miñoto. Ademais do primeiro equipo, estiveron presentes todos os colectivos de base, así como o masculino, que inicia a súa segunda tempada desde o seu renacemento.
O acto estivo encabezado polo presidente da entidade, Jesús López, que contou co respaldo de toda a súa Xunta Directiva. Tamén acudiron a cítaa autoridades como Gorka Gómez, Deputado provincial de Deportes da Deputación de Pontevedra.
Ás 20:30 comezou o evento cunha actuación do grupo do Centro de Danza Dansá. Acto seguido, foron presentados todos os equipos da base xunto aos seus respectivos adestradores, o conxunto masculino e, finalmente, a primeira escuadra.
Compareceron todas as fichaxes menos Pauli Fernández, que segue na súa Paraguai natal á espera de que as autoridades do seu país tramiten o seu visado. Si estiveron África Sempere, na súa volta a casa, e Giselle Menéndez, Cris Cifuentes, Elena Amores, Celia López e Júlia Noz. Xunto a elas, o resto das súas compañeiras. Tamén as tres capitás, Carla Gómez, Patrícia Lima e Marisol Carratú. E, por suposto, o novo capitán do barco, un Abel González que mostrou o seu optimismo habitual no discurso.
O presidente do o Club Balonmán Atlético Guardés, Jesús López, pechou o acto cun discurso no que mesturou a ilusión polo futuro, coa base como eixo central, e as ilusións postas neste persoal. “Cando asumín a presidencia, deixei clara a importancia que ten para min a canteira. Ver como crece aos poucos é o meu motivo de orgullo máis persoal”, expresou sobre o proxecto de base, que este ano comandará Fabio Lima como coordinador. “Queremos seguir sendo unha referencia en España, seguir pelexando cos mellores na parte alta da clasificación, seguir competindo en Europa e seguir chegando a finais”, destacou o máximo mandatario.
Jesús López tamén recoñeceu que a dificultade é “maior cada ano” polo músculo financeiro que seguen acumulando os seus rivais. E nese sentido, pediu “un impulsito” en forma de apoio ás institucións. Tamén tivo palabras de agradecemento para os socios, en “este ano tan especial” por ter que xogar varios meses en Tui debido ás obras do pavillón. “Voso empuxe impúlsanos. A vosa paixón, contáxiase. Necesitámosvos no barco. Necesitámosvos a todos a bordo”, concluíu Jesús López, en clara alusión ao lema da campaña de abonados da entidade.
O Guardés pecha a pretemporada cun triplo compromiso: Summer BAG e SuperCopa
Só unhas horas despois de concluír a presentación, o Club Balonmán Atlético Guardés sóbese ao autobús para viaxar á localidade leonesa de Villacelama. Alí celébrase este ano o Summer BAG Experience, torneo co-organizado con Bera Bera e Aula, que este verán non podía levar a cabo na Sangriña polas súas obras de reforma.
Ás 11:30 parte a expedición da Guarda para chegar ao destino ás 17:00 tras comer na Gudiña. Ás 20:30 disputará a segunda semifinal do torneo fronte a Aula Valladolid. Antes, ás 18:00, mediranse Bera Bera e Benfica.
O primeiro Summer BAG Experience internacional contará co Benfica como convidado
Dependendo do que suceda, o equipo de Abel González xogará o sábado ás 11:00 (terceiro e cuarto posto) ou ás 13:30 (final).
Unha vez conclúa o torneo, emprenderá regreso a casa para descansar o máximo posible. O domingo pecha a maratoniana fin de semana e a pretemporada coa Supercopa Galicia da Federación Galega de Balonmán, que lle medirá ao Conservas Orbe Rubensa Porriño no Gatañal (17:00). Despois virá o lume real, co inicio da liga Guerreiras Iberdrola o sábado 3 de setembro en Tui.
Porriño e Guardés xogarán a SuperCopa de Galicia esta fin de semana
