- O Mecalia Atlético Guardés lanza a súa campaña de abonos mantendo os prezos da tempada pasada e chamando á afección a subir a bordo.
- O equipo miñoto xogará no pavillón de Tui os seus partidos como local na División de Honra mentres dure a reforma da Sangriña.
Tal e como marca a tradición, o Club Balonmán Atlético Guardés lanza a súa campaña de abonados para a tempada 2022/23. Faio cun vídeo promocional que pretende xerar sentimento de pertenza e animar aos socios de sempre -e aos novos- a acompañar ao equipo nesta complicada campaña. E é que o colectivo que dirixe Abel González terá que xogar como local en Tui durante varios meses polas obras de reforma do pavillón municipal da Sangriña.
A maior parte da peza audiovisual está gravada no ‘Piueiro‘, volanteiro tradicional da Guarda, cuxa tripulación trata de manter vivas as tradicións mariñeiras da localidade. E nesa misión tamén quixo participar o club, incluíndo no vídeo ás ‘atadeiras’. É o nome que reciben as redeiras no pobo desde tempos pretéritos e o que as xogadoras usarán como alcumo este curso. Unha homenaxe ao traballo silencioso de varias xeracións de mulleres, indispensable para impulsar a actividade relacionada co mar, imprescindible nunha vila mariñeira como A Guarda.
🗺️ E ti, sabes que tesouro se agocha ó outro lado deste mar?
⛵ Ven descubrilo connosco!#TodasaBordo pic.twitter.com/hcI3i3SPnD— Mecalia Atlético Guardés (@Atlguardes_ofic) August 17, 2022
A curta desenvólvese coas xogadoras do primeiro persoal efectuando os diversos labores do barco e atando redes, mentres a voz en off da xornalista Paula Montes locuta un texto. Durante o minuto que dura a peza, hai alusións diversas a travesías en barco e chiscadelas aos piratas. Ao final, todo conflúe no lema ‘Todas a bordo’, que pretende animar á afección para acompañar ao equipo nesta metafórica singradura lonxe de casa.
O Guardés xogará en Tui mentres se reforma A Sangriña
Nese sentido, o club miñoto chegou a un acordo co Concello de Tui e co Balonmán Tui para poder xogar no seu pavillón os partidos como local da competición doméstica ata que a reforma da Sangriña estea completa.
Os prazos máis optimistas de entrega falan de finais do mes de outubro. Con todo, co parón do Europeo de novembro polo medio e coas festas do Nadal tan preto, no club estiman que non se volverá a casa ata decembro ou, mesmo, xaneiro.
Mesmos prezos do abono que o ano pasado
Para esta campaña de socias/os, o Club Balonmán Atlético Guardés mantén os mesmos prezos que no curso pasado. A clase xeral custará 75 euros. A partir de aí, 65 para maiores de 65 anos, 50 para menores de 20 e 40 para menores de 13. Ademais, hai unha categoría de empresa, a 100 euros, que permite intercambiar o carné -os demais deben presentarse xunto ao DNI-.
🧐 Dous xeitos:
➡️Presencial
📌Oficina provisional, no baixo de Concepción Arenal, 19
📅 De luns a venres
🕐 De 16:30 a 20:30➡️Telemático
📧 Envía un correo a coordinador@balonmanatleticoguardes.com cos datos que se indican no cartaz.
📩Recibirás instruccións na resposta. pic.twitter.com/9vwEtJG8mU— Mecalia Atlético Guardés (@Atlguardes_ofic) August 17, 2022
Segundo informan desde o Club Balonmán Atlético Guardés este abono é válido para todos os partidos da liga regular, para a rolda preliminar da Copa da Raíña e para a segunda eliminatoria da EHF European Cup, á que o Guardés entrará directamente en decembro. O conxunto miñoto quedou exento da primeira por ser un dos cabezas de serie da competición.
Se o Mecalia Atlético Guardés consegue avanzar en Europa, será preciso abonar un suplemento para os sucesivos encontros que poida disputar. Mesmo proceso que se establecerá para a post-tempada, que se estrea este curso. Cando termine a liga regular, os oito primeiros competirán polo título e os catro últimos, pola permanencia. Nese momento, a entidade explica que “a directiva da entidade poñerá á venda uns abonos cuxo prezo se establecerá en función do roteiro que tome o equipo”.
