- O Mecalia suma a súa cuarta vitoria consecutiva
- O vindeiro sábado 20 de xaneiro (20:00h), o conxunto miñoto tratará de conseguir en Xixón o seu pase directo á fase final da Copa da Raíña
O Mecalia Atlético Guardés comeza 2024 cunha grandísima vitoria fronte ao Super Amara Bera Bera (31-28). Grandísima porque suma a súa cuarta vitoria consecutiva e porque o fai fronte ao equipo que ocupa o segundo lugar na táboa da liga Guerreras Iberdrola.
A velocidade e o acerto para portería marcaron os primeiros minutos do encontro. Empezou marcando Cecilia Cacheda e, tras o seu gol, chegarían os de Cris Cifuentes e África Sempere para impulsar ao Mecalia. Antes de chegar aos dous minutos de partido, o marcador reflectía xa un 3-1 para as galegas, que xogaban cunha máis que as vascas tras a expulsión de Maitane Echeverría (min. 2).
Con todo, diante un xigante como o Bera Bera, todo pode cambiar dun momento a outro. As xogadoras de Imanol Álvarez apertaron e conseguiron asinar táboas momentaneamente (5-5) antes de chegar ao minuto 10, pero o conxunto miñoto, alentado pola calor da súa afección, volveu rapidamente a dominar no electrónico, cunha Itziar Martínez que non fallaba desde a primeira liña e un Estela Carrera convertida nun auténtico muro en portería. Iso provocou o primeiro tempo morto solicitado por Imanol Álvarez (min. 14).
Sete goles de marxe para o Guardés
A vantaxe lograda polo Mecalia Atlético Guardés, que chegou a distanciarse por 7 goles, foi a menos debido á expulsión a María Palomo (min. 20). O Super Amara Bera Bera ía, aos poucos, achegándose no marcador, o que provocou o segundo tempo morto solicitado, esta vez, por Cristina Cabeza (min. 24).
O encontro renovouse con gol de Ania Ramos, que foi excluída pouco despois (min. 27). A primeira parte terminou cun lanzamento errado de Sandra Radovic desde os 9 metros e un 18-15 no marcador.
Dúas expulsións para o Bera Bera no arranque do segundo acto
O primeiro gol da segunda metade non chegou ata o minuto 3. Cecilia Cacheda abriu a lata nun segundo acto que arrincou cunha defensa férrea por parte das vascas. Tanto apertaron que dúas expulsións moi seguidas (Lydia Blanco, min. 34; Emma Boada, min.35); puxeron ás donostiarras contra as cordas xogando con inferioridade numérica nun duelo no que calquera detalle podía supoñer un punto de inflexión.
Con todo, o Mecalia Atlético Guardés dominou. Un gol de África Sempere desde os sete metros puxo ao Guardés con 6 de vantaxe (22-16) no minuto 10 do segundo acto. Ante o ritmo de xogo do Mecalia Atlético Guardés, Imanol Álvarez solicitou tempo morto para tratar de darlle a volta ao envite.
O conxunto miñoto continuou liderando o xogo no seu feudo, cunhas bancadas entregadas ao seu equipo. O poderío local palpábase nas dúas áreas: en ataque, o Mecalia Atlético Guardés non fallaba; en portería, Míriam Sempere estaba a ser clave para manter as distancias.
Triunfo loitado para o Mecalia que colleita a 4ª vitoria seguida
A pesar de todo, o equipo donostiarra logrou estar soamente a dous de empatar a un minuto do asubío final. A vitoria puido escapárselle ao conxunto miñoto, pero non foi así. Loitou cada balón e aguantou a renda conseguida na primeira metade. O partido finalizou cun 31-28.
O Mecalia Atlético Guardés volverá xogar o vindeiro sábado día 20 de xaneiro (20:00 horas), contra o Motive.co Gijón, no partido correspondente á segunda fase da XLV Copa da Raíña. A eliminatoria, a partido único, dispútase no Pavillón da Area.
FICHA TÉCNICA
31) MECALIA ATLÉTICO GUARDÉS (18+13): Miriam Sempere (p.), Elena Amores (3), María Paula Fernández (3), Cecilia Cacheda (4), Itziar Martínez (6), Cristina Cifuentes (2), África Sempere (6), María Sancha (1), María Palomo (1), Estela Carrera (p.), Blazka Hauptman (2), Ania Ramos (2), Sandra Radovic (1), Andreza Almeida, Venera Surjan.
28) SUPER AMARA BERA BERA (15+13): Mariane Oliveira (3), Esther Arrojería (2), Marie Louis, Emma Boada (5), Alba Menéndez (1), Laura Hernández (2), Malena Cavo (1), Maitane Echeverria (1), Maddi Aalla (p.), Elke Josselinne, Lyndie Tchaptchet (4), Anne Erauskin (6), Lydia Blanco (3), Giuliana Gavilan, Carmen Arroyo, Haizea Urretabizkaia, Alice Fernandes (p.).
PARCIAIS CADA CINCO MINUTOS: 4-1, 8-6, 11-7, 14-7, 15-12, 18-15 (descanso); 20-16, 21-16; 23-19; 26-21; 29-26; 31-28.
EQUIPO ARBITRAL: Carlos Friera y Andrés Rosendo. Excluyeron con 2 minutos a las visitantes Maitane Echeverría (min. 2, min.9), Laura Hernández (min. 28), Lydia Blanco (min. 34), Emma Boada (min. 35); y a las locales María Palomo (min. 4, min. 20), Ania Ramos (min. 27, min. 40) y Cecilia Cacheda (min. 50). Amonestaron con tarjeta amarilla a Imanol Álvarez (min. 23).
INCIDENCIAS: Partido da 14ª xornada da Liga Guerreras Iberdrola, disputado no Pavillón municipal da Sangriña na Guarda.
