Esta fin de semana celebrarse no Gatañal a fase final da Copa de Galicia (feminina e masculina), así como a final da SuperCopa feminina que enfrontará ao Conservas Orbe BM Porriño e o Mecalia Atlético Guardés. Na Copa Galicia feminina participarán o Rubensa BM Porriño, Asmubal Meaño, Calvo Xiria – Oliveira&Faro e Saeplast Cañiza. A competición terá lugar no citado pavillón de Cangas do Morrazo de venres a domingo. A presentación do evento celebrouse coa presenza de representantes dos clubs participantes.
Nunha contorna paradisíaca, xunto a Praia de Menduíña en Cangas, tivo lugar o acto de presentación da Copa Galicia e SuperCopa Galicia 2022, que se disputará no Gatañal do 26 ao 28 de agosto, segundo informa a Federación Galega de Balonmán. No devandito acto estiveron presentes a alcaldesa de Cangas, Victoria Portas; o secretario xeral para o Deporte, José Ramón Lete; a deputada provincial Ana María Mejías; a concelleira de Deportes de Moaña, Dolores Chapela; e o presidente en funcións da Federación Galega de Balonmán, Bruno López, ademais dunha importante representación dos clubs participantes.
O presidente en funcións Bruno López recordou que hai dous anos cambiou o formato desta competición, “para poñer en valor o balonmán galego, dando máis visibilidade a esta competición, queríamos crearlle aos xogadores e xogadoras a necesidade de xogar esta fase final, e queríamos darlle cabida aos equipos de autonómica”. E dous anos despois o balance non pode ser máis positivo, xa que “temos claro que a Copa e SuperCopa Galicia é a mellor competición do balonmán galego e unha das máis vistosas a nivel nacional”.
Bruno López, presidente en funcións da Federación Galega de Balonmán: “temos claro que a Copa e SuperCopa Galicia é a mellor competición do balonmán galego e unha das máis vistosas a nivel nacional”.
Bruno López, presidente en funcións da Federación Galega de Balonmán declaraba na presentación que animaba: “Á xente a que acuda. Imos engalanar o pavillón do Gatañal, vai ser un espectáculo deportivo pero tamén social, velo pola televisión ou streaming non vai ser o mesmo. Será unha festa do balonmán galego para que todo o mundo disfrute”.
Foi un acto no que os clubs e os seus xogadores e xogadoras foron os grandes protagonistas, para presentar unha competición que comezará o venres coa disputa das semifinais da Copa Galicia masculina.
A alcaldesa de Cangas, Victoria Portas, daba: “grazas á federación por volver pensar en Cangas esta competición. Vivimos o balonmán case como unha relixión. Gústanos disfrutar do deporte e da competición”. Destacou Victoria Portas “gran aposta polo deporte feminino que merece chegar a un ámbito profesional igual ca o masculino. No balonmán estase apostando por iso. Grazas pola aposta polos equipos femininos. Xa é hora de que o deporte feminino chegue ao ámbito que se merece en todo tipo de competicións”.
O secretario Xeral para o Deporte, José Ramón Lete Lasa, destacou o traballo que están a facer dende clubs e institucións coma a Federación Galega de Balonmán, á cal definiu coma unha das máis proactivas e innovadoras, para que pouco a pouco, segundo as súas verbas o balonmán galego vaia recuperando a súa posición privilexiada no contexto nacional, coma a que xa gozara na temporada 96-97 co Teucro, Octavio, Cangas e Chapela disputando a mellor liga do mundo.
Por último o mandatario galego animou a achegarse a Cangas nesta fin de semana para desfrutar “da maior festa do balonmán galego”. Neste sentido lembrou como o en 2021, a competición celebrouse con restricións por mor da pandemia pero sinalou que, nesta ocasión, grazas ao esforzo de todos os galegos, volve con toda a súa forza.
O BM Porriño ten presenza tripla nesta cita tripla do balonmán galego
En total será dez partidos en tres días e 12 clubs participantes, aínda que o BM Porriño terá tripla presenza, xa que clasificou a tres equipos para a fase final (o masculino e o de División de Honra Prata feminino na Copa e o equipo feminino da Liga Iberdrola na Supercopa Galicia).
No caso da Copa Galicia masculina de balonmán participan os equipos galegos de segundo nivel, contando cos 8 equipos de 1ª nacional e os 8 primeiros clasificados de 1ª autonómica. Xa disputados os octavos e cuartos de finais desta competición autonómica, o U.B. Lavadores de Vigo, o Carnes Doribeiro de Ourense, o C.B Porriño e o Bueu Atlético Balonmán mediranse esta fin de semana para coñecer ao campión galego.
No que atinxe ao cadro feminino da Copa Galicia de balonmán participan os catro equipos de Prata, así como os catro primeiros conxuntos da Primeira Autonómica. Unha vez disputados os partidos de cuartos de final, xogarán esta fin de semana en Cangas do Morrazo: C.B. Porriño B, o Asmubal Meaño, o Calvo Xiria e o Balonmán Cañiza. Entre todos eles loitarán por facerse coa coroa galega copeira.
A SuperCopa pola súa banda recolle aos mellores equipos galegos, no caso feminino os dous equipos de División de Honor, Conservas Orbe Rubensa BM Porriño e o Mecalia Atlético Guardés. Mentres que na categoría masculina, os equipos de Asobal Prata e os catro primeiros conxuntos da Liga Nacional serán os que pelexarán por obter unha praza nas semifinais e final. Os dous equipos de Asobal – Cangas e Cisne – e o Lalín e o Novás tentarán dar a sorpresa para proclamarse supercampións.
Calendario da Copa Galicia e Supercopa Galicia Feminina
Venres 26 de agosto
SEMIFINAIS COPA GALICIA MASCULINA
- 19:00 horas – UB Lavadores – BM Ribeiro Rodosa Ourense Provincia Termal
- 21:00 horas – Indupor BM Porriño – Bueu Atlético Balonmán
Sábado 27 de agosto
SEMIFINAIS COPA GALICIA FEMININA
- 11:00 – Rubensa BM Porriño – Asmubal Meaño
- 13:00 – Calvo Xiria – Oliveira&Faro Saeplast Cañiza
SEMIFINAIS SUPERCOPA GALICIA MASCULINA
- 17:00 – Cisne Colegio los Sauces – Valinox Novás
- 19:00 – Frigoríficos do Morrazo – Disiclín BM Lalín
Domingo 28 de agosto
- FINAL COPA GALICIA MASCULINA …………………..………11:00
- FINAL COPA GALICIA FEMININA ………………………..……..13:00
- FINAL SUPERCOPA GALICIA FEMININA
- Mecalia Atlético Guardés – Conservas Orbe Rubensa BM Porriño….17:00
- FINAL SUPERCOPA GALICIA MASCULINA ……………………19:00
Todos os partidos serán emitidos en streaming pola canle de YouTube da Federación Galega de Balonmán, na que xa se pode ver tamén o acto de presentación desta fase final da Copa de Galicia e a SuperCopa de Galicia feminina.
