O Pescados Rubén Burela e o Ourense Envialia cítanse de novo. Desta vez a ocasión será unha final, a correspondente á XIV Copa Galicia de fútbol sala. A gran cita comezará ás 17:00 horas do sábado 15 de maio e será retransmitida pola canle autonómica TVG2. O escenario do acontecemento deportivo será o pavillón municipal da Gándara de Narón.
Este duelo enfronta a dous dos grandes equipos do futsal galego feminino. Ambos compiten na máxima categoría estatal desta disciplina e quedaron enmarcados esta tempada no grupo polo título na segunda fase da competición.
O todopoderoso Pescados Rubén Burela FS, vai a por cada título que se le pon no camiño. Xa conquistou a Copa da Raíña, onde xa se enfrontaron ás ourensás nos cuartos da final. De feito, este duelo irmandiño entre as da Mariña e as ourensás é o terceiro só 3 semanas, engadindo á Copa o partido de Liga no que mediron forzas. Así estamos diante de dous equipos que se coñecen perfectamente.
Así vive Lara Balseiro a Copa Galicia
Para as Guerreiras Larnaxas, o Ourense Envialia é un rival de altura. Así o admite a viveirense Lara Balseiro, quen asegura que “somos favoritas pola traxectoria da liga e pola tempada, pero en realidade nunha final pode pasar de todo. O Ourense, a pesar das baixas, ten un cadro moi competitivo, virá con ganas de desquitarse e teremos que volver dar o cento por cento, como xa o fixemos nos últimos enfrontamentos con elas, para conseguir un bo resultado”.
Lara Balseiro: “O Ourense, a pesar das baixas, ten un cadro moi competitivo, virá con ganas de desquitarse e teremos que volver dar o cento por cento”
A 10 burelista estivo presente nas cinco anteriores edicións da Copa Galicia gañadas polas da Mariña, desde a primeira no 2009, ata a última, no 2019.
Sobre a primeria delas declara que “do que pasou na pista non recordo moito; fora en Ourense e recordo que foi moi especial por ser o primeiro”, di Balseiro, que entón tiña 16 anos. Da última edición, Riazor 2019, recorda que “foi moi bonita; estaba a miña familia enteira entre o público”.
Lara Balseiro: “Fainos ilusión sempre, a min sobre todo porque é a Copa da casa.”
En liñas xerais, a ala de Viveiro asegura que a todas as laranxas “fainos ilusión sempre, a min sobre todo porque é a Copa da casa. Levamos unha etapa moi boa, levamos moitos meses encadeando títulos e queremos seguir nesa liña”.
O camiño á final
Tanto Burela como Envialia chegan á final da Copa Galicia de Narón despois dunha gran traxectoria. O vixente campión, as Guerreiras Laranxas, eliminaron nas semifinais ao Viaxes Amarelle, mentres que as ourensás o fixeron contra o Poio Pescamar.
Este cruce será unha reedición da última final da Copa Galicia, disputada no Pazo dos Deportes de Riazor, da Coruña. Entón, as burelistas leváronse o título vencendo ao Cidade de As Burgas. Pero cada final é unha historia e o resultado é impredecible por moito que as Guerreiras Laranxas estean enchufadas a gañar cada título que teñen ocasión de conquistar.
O Pescados Rubén Burela buscarán este sábado o seu sexto título autonómico mentres que este sería o quinto para as ourensás. Nas vitrinas de ambos os dous conxuntos hai espazo abondo para poder apañar un novo trofeo, e senon houbera, faise.
🎥 @EnXogo_tvG2 🔥 COPA GALICIA // FINAL
🏆FINAL // COPA GALICIA
📍 PAB. A GÁNDARA
📆 15/05
⏰ 17:00H
📺 TVG2
⚽️ #ourenseenvialia · @burelafs🚀 #ubuntu
🧡 #imosolio 💜 #libresParaSer#morraOconto #hastaelultimoaliento #fsf #futsal #futsalfemenino pic.twitter.com/Zjfwbuumla— Ourense Envialia FSF (@OUenvialiaFSF) May 14, 2021
Entradas esgotadas
Esta gran final terá un aforo completo. As case 200 entradas postas á venda esgotáronse a falta de 24 horas para o encontro. Os despachos de billetes do pavillón da Gándara permanecerán pechados o sábado.
Lara Balseiro: “Será unha gran festa do fútbol sala galego”
A burelista Lara Balseiro apuntou que “para nós a afección é moi importante. Nos últimos partidos en Vista Alegre xa puidemos contar con ese apoio e estamos moi ilusionadas con que volva a xente aos pavillóns. Será unha gran festa do fútbol sala galego”.
