A Real Federación Española de Fútbol confirmou a localidade madrileña de Torrejón de Ardoz como sede do play-off polo título na Primeira División Feminina de fútbol sala. Catro serán os equipos que loiten polo título: Pescados Rubén Burela, Atlético Futsi Navalcarnero, STD Roldán FSF e AD Alcorcón FSF son os clubs clasificados para esta fase que se xogará en formato de Final a 4
Esta última etapa competitiva na Primeira División Feminina do FutSal español disputarase do 11 ao 13 deste mes de xuño.
Nas semifinais enfrontaranse por un lado os dous equipos madrileños (primeiro e cuarto na liga regular), Futsi e Alcorcón e polo outro lado xogarán Burela e as murcianas do Roldán, segundo lembra a RFGF.
A RFEF anuncia que está a traballar para que poida haber público nas gradas, sempre dacordo coas autoridades sanitarias.
O Burela quere que a vitrina se lle quede pequena
O Pescados Rubén Burela quere completar a tempada perfecta sumando o título de Liga estatal aos que xa colleitou esta tempada: Copa de Galicia, Copa da Raíña, Supercopa de España.
Tal e como anticipaba Julio Delgado, técnico das Guerreiras Laranxas, logo de que estas colleitasen a súa sexta Copa Galicia: “Cando conseguimos o triplete con todos os títulos en xogo gañados, dixemos que era case imposible repetir, pero fixemos fincapé en que quedamos co case. Conseguimos Supercopa, Copa da Raíña, Copa Galicia e a liga será a guinda do pastel. Ímonos a preparar moito para ir a por ela, sen dúbida”. Chegou o momento de pórlle esa guinda á torta.
Julio Delgado: “Conseguimos Supercopa, Copa da Raíña, Copa Galicia e a Liga será a guinda do pastel”
