O Pescados Rubén Burela vencía por 1-5 ao Ourense Envialia na Copa Galicia 2021 que organiza a Real Federación Galega de fútbol. A satisfacción do adestrador das Guerreiras Laranxas, Julio Delgado, era evidente ao final do partido cando compareceu ante os medios. Contento co trunfo e co título, o entrenador xa pensaba no seguinte reto: gañar a Liga e quedarse con todos os títulos en xogo deste curso 2020-21.
Julio Delgado manifestaba ante os micrófonos da prensa que a motivación “é fácil con este grupo. Adoitamos manter os pés no chan e disputar cada partido e cada adestramento. Coa situación que estamos a vivir temos que dar grazas a deus de poder seguir adestrando día a día e logo disputar estes títulos. O equipo creceu moitísimo nese aspecto. É moi maduro dentro da pista e demostrámolo cada partido, eu creo. Pero a motivación pona a plantilla”.
Marcara axiña foi unha das claves para Julio Delgado
Conseguir anotar un gol tan cedo foi un dos puntos chaves para a vitoria do conxunto burelista. O seu técnico é consciente diso e relataba: “Tivemos o acerto de pornos enseguida por diante. Deunos unha tranquilidade que non nos pasou, por exemplo, no partido de casa que ían 17 minutos e puxéronse por diante. Iso, máis a madurez do equipo, que soubo deixar pasar os minutos e aproveitar as nosas ocasións”.
O Ourense Envialia non se deu por vencido, e logo do descanso plantoulle cara ás Guerreiras Laranxas. Neste sentido, Julio Delgado explicaba: “Na segunda parte elas saíron máis enrabietadas a buscarnos arriba, iso prexudicounos, pero ao conseguir o terceiro matamos o partido”.
Coa mirada posta no seguinte reto o técnico do Pescados Rubén Burela declaraba: “Cando conseguimos o triplete con todos os títulos en xogo gañados, dixemos que era case imposible repetir, pero fixemos fincapé en que quedamos co case. Conseguimos Supercopa, Copa da Raíña, Copa Galicia e a liga será a guinda do pastel. Ímonos a preparar moito para ir a por ela, sen dúbida”
Ale de Paz: “O Ourense púxonos as cousas máis difíciles que en outros partidos”
Tamén respondeou ás preguntas dos medios a futbolista burelista Ale de Paz, que valora a conquista do sexto título de Copa autonómico para as Guerreiras Laranxas. “Estamos nunha boa liña”, manifestaba a deportista galega.
Para a xogadora do Pescados Rubén Burela “o resultado de traballar duro todo o ano estase vendo reflectido nos títulos. Non foi nada doado. O Ourense púxonos as cousas máis difíciles que nos encontros pasados. Un 5-1 nos deu momentos de tranquilidade e comodidade, pero non durante todo o partido”.
Como o seu adestrador, a futbolista, logo de conquistar a Copa Galicia, xa tiña en mente o seguinte título en liza: “Quédanos o play-off de Liga. Xa estamos clasificadas e xa estamos pensando nos encontros desa fin de semana”.
