A quinta xornada da segunda fase chega cun emocionante derbi galego. Pescados Rubén Burela e Ourense Envialia veranse as caras na pista das mariñás este sábado, 24 de abril, ás 19:00 horas. O duelo será un anticipo dos cuartos da Copa da Raíña, que tamén enfrontan no cruce a estes dous clubs.
“Nun derbi sempre pode pasar de todo, hai un plus de ganas”, declara Cami, xogadora das Guerreiras Laranxas. No anterior enfrontamento, a vitoria foi para as burelistas, que venceron por un 1-4 nos Remedios. Neste duelo, o Envialia non foi quen de controlar ás tricampioas, mentres que as entón visitantes dominaron comodamente o encontro.
Burela e Envialia chegan desigualados ao derbi
Ambos equipos están na procura dun posto para o play-off polo título, aínda que as laranxas chegan como favoritas, ao ter perdido só un encontro. Este foi precisamente na anterior xornada, cando o Burela caeu derrotado no clásico ante o Futsi Atlético.
Este resultado non baixa os ánimos das lucenses. Cami asegura que tras a derrota “saímos máis fortes, seguimos xuntas para seguir traballando e corrixir os erros”.
Cami: “Saímos máis fortes, seguimos xuntas para seguir traballando e corrixir os erros”
Pola súa banda, as de Morenín ocupan a última praza do grupo polo título, aínda que están en fase ascendente. As baixas están a castigar moito ás ourensás esta tempada. No último partido, ante o Torreblanca Melilla, as da Cidade das Burgas sumaron a súa primeira vitoria, cun resultado de 3-4.
Ver esta publicación en Instagram
Por iso, a oito laranxa considera que o conxunto do Ourense Envialia “virá motivado, é unha vitoria importante, que ademais necesitaba moito”.
Para este encontro o técnico, Julio Delgado, contará con todas as xogadoras a excepción de Jane, que causa baixa debido a unha escordadura leve de nocello.
Este derbi galego do fútbol sala feminino poderá seguirse en directo a través do sinal da TVG2.
Con media mente posta na Copa da Raíña
A emoción e ilusión por este derbi aumentará tendo á volta da esquina o cruce na Copa da Raíña. O destino quixo cruzar aos dous únicos equipos galegos que disputan a competición en cuartos, e só un deles poderá acceder ás semifinais.
Cami: “Agora mesmo a concentración está no sábado, despois tocará pensar en Las Rozas”
A peche do Pescados Rubén Burela, vixente campión, recoñece que disputar este torneo “é moi bonito”, pero antes diso deberán centrarse nesta xornada: “Agora mesmo a concentración está no sábado, despois tocará pensar en Las Rozas”, sinala.