Logo duns días de repouso na súa Estrada natal e coa mirada apuntando ao gran premio de Silverstone, un dos epicentros do automovilismo cuxas trazadas debuxaron auténticas lendas do motor como Ayrton Senna ou Valentino Rossi, Uxía Rodríguez Nebra atendeu Ás Nosas para facer balance do arranque de tempada no que é o seu debut na categoría de bronce do motociclismo mundial: a Moto3.
Formada en mecánica no IES Plurilingüe Antón Losada Diéguez do Concello da Estrada, tivo que desprazarse ata a Escola Técnica de Girona para continuar coa súa formación. Desde alí, recibiu unha chamada que o cambiaría todo, Aurora Angelucci, CEO da escudería MTA Angeluss decidiu apostar por dúas estudantes do centro para seguir formándose desde dentro do paddock.
Foi, simbólicamente, o 8 de marzo (Día Internacional da Muller) cando se oficializou a súa incorporación á escudería italiana. Acabada de superar a vintena converteuse na primeira galega en acadar o cumio do motociclismo profesional. Agora, consolidada no equipo, Uxía Rodríguez Nebra aspira a prolongar o que comezou como un soño e porqué non a acadar metas máis altas da man do seu equipo.
Ver esta publicación en Instagram
A.N.: Como chega unha rapaza de 21 anos a Moto3, a categoría de bronce do motociclismo mundial. Cal é realmente a dimensión deste salto?
UXÍA RODRÍGUEZ NEBRA: Eu sinceramente recoñezo que non cheguei a dar este salto pola miña experiencia, como é evidente, a escudería contactou coa Escola Técnica de Girona onde estaba a estudar e aí xurdiu a oportunidade de unirme ao equipo. Con perspectiva recoñezo que tiven sorte, non é normal dar este salto tan repentino a participar nun mundial, o máis frecuente é facelo dun xeito máis progresivo.
Uxía Rodríguez: “Sempre fun afeccionada ao motor”
A.N.: De onde xorde esta afección polo motociclismo?
UXÍA RODRÍGUEZ NEBRA: Realmente sempre fun moi afeccionada ao mundo do motor, aos rallyes, a Fórmula 1… O meu pai tamén é un gran tamén dos deportes de motor, os meus amigos tamén tiñan afección, os compañeiros de estudos… Debo recoñecer que desde que formo parte do equipo o meu interese polo motociclismo foi en aumento.
A.N.: Como é o día a día nun paddock de Moto3?
UXÍA RODRÍGUEZ NEBRA: O noso traballo concéntrase principalmente na propia semana de competición. As fins de semana comezan o mércores e rematan o domingo coa carreira. Principalmente as miñas labores consisten na preparación de neumáticos, a limpeza dos compoñentes da moto e labores de lousa. Temos un equipo moi ben estruturado no que cada unha de nós sabemos o que debemos facer en cada momento.
A.N.: O mundo do motor é un ámbito masculinizado, que supón a aposta de escuderías como Angelus MTA por contar con mulleres no seu equipo dándolle ademais un papel activo no desenvolvemento da tempada?
UXÍA RODRÍGUEZ NEBRA: Pois que vou a dicir, para min é unha iniciativa extraordinaria e necesaria. Estou eternamente agradecida a Aurora Angelucci pola súa aposta e confianza, e especialmente por darnos un escaparate co que demostrar que podemos desenvolver este oficio de igual xeito que calquera home.
Uxía Rodríguez Nebra, mecánica na escudería MTA Angeluss na Moto3: “Estou eternamente agradecida a Aurora Angelucci pola súa aposta e confianza, e especialmente por darnos un escaparate co que demostrar que podemos desenvolver este oficio de igual xeito que calquera home”
A.N: Os resultados están reafirmando o bo traballo que está a desenvolver o equipo, terceiras no mundial de construtores e Iván Ortolá cuarto na clasificación de pilotos. Cal é a clave?
UXÍA RODRÍGUEZ NEBRA: Temos unha moi boa compenetración dentro do equipo, xeramos dinámicas positivas que creo que logo se reflexan nos resultados que acada o equipo. Iván é un piloto fantástico, con experiencia na categoría, e iso é un factor clave. O noso traballo debe ser ofrecerlle a mellor moto posible tanto a Iván como a Nepa.
A.N.: A que aspira o equipo, vedes posible a pelexa polo mundial de construtores?
UXÍA RODRÍGUEZ NEBRA: Como dixen antes, vai depender en gran medida do rendemento dos pilotos. A miña opinión é que nesta división os pilotos supoñen o 80% dos resultados finais. Penso que debemos seguir traballando e ofrecerlle en todas as carreiras unha moto nas mellores condicións posibles.
A.N.: O salto dos estudos a participar desde dentro nun mundial ten que dar certa vertixe.
UXÍA RODRÍGUEZ NEBRA: Supuxo un gran cambio si. A miña vida era bastante rutinaria e agora ademais de seguir aprendendo podo sentirme realizada, sentirme parte dun gran equipo profesional e humano e percorrer gran parte do mundo da súa man.
A.N.: Cal foi a saída que máis desfrutaches?
UXÍA RODRÍGUEZ NEBRA: Pois Mugello foi un circuíto moi especial pola contorna, aínda que a que sempre levarei comigo foi o GP de Austin no que Iván acadou a vitoria. Foi unha das mellores experiencias da miña vida.
A.N.: E a que agardas con máis ganas?
UXÍA RODRÍGUEZ NEBRA: Pois diría que Australia e Xapón, son dúas visitas que me fan especial ilusión.
Uxía Rodríguez Nebra: “As outras rapazas que desexen formar parte do motociclismo profesional diríalles que nunca deixen que ninguén lles diga que é imposible cumprir este soño, que traballen moi duro para facelo realidade porque ninguén regala nada, pero que non permitan que ninguén lles faga renunciar ao que desexan”
A.N.: Para rematar, que lle dirías desde a túa posición actual a unha rapaza que ao igual que ti sempre desexou formar parte do motociclismo profesional?
UXÍA RODRÍGUEZ NEBRA: Que nunca deixen que ninguén lles diga que é imposible cumprir este soño, que traballen moi duro para facelo realidade porque ninguén regala nada, pero que non permitan que ninguén lles faga renunciar ao que desexan.
Ver esta publicación en Instagram
