O Viaxes Amarelle xógase o seu futuro esta fin de semana. As herculinas deberán loitar na súa última oportunidade por salvar a categoría ante o Joventut D’Elx, nunha cita que terá lugar no pavillón municipal Esperanza Lag de Elche este sábado. 19 de xuño, ás 19:30 horas.
O rival das coruñesas estivo competindo este curso na Segunda División e tivo xa a súa oportunidade de asinar o ascenso á máxima categoría, no duelo da Fase de Ascenso ante o Marín Futsal, que gañaron as galegas xunto o billete á promoción directa.
Histórico ascenso do ENCE Marín Futsal que xogará por vez primeira na elite estatal
Antes de disputar esta fase de promoción, o conxunto ilicitano rematou na primeira posición do Grupo 2 da Segunda División tras sumar 110 goles a favor e 36 tantos en contra nos 2 encontros disputados da competición regular. O seu balance foi de 20 vitorias, dous empates e dúas derrotas, acadando os 62 puntos.
Tras a fase regular, as xogadoras de Elche venceron na fase previa á de ascenso ao Les Corts AE cun 6-2 final e do CD La Concordia, cun 6-0. Na terceira eliminatoria non foron quen de vencer ao ENCE Marín Futsal, que será equipo de Primeira na vindeira campaña.
O Amarelle irá a por todas
Pola súa parte, o equipo galego, dirixido por Jorge Basanta, afrontou unha semana de adestramentos atípica, con xornadas de luns a xoves na súa pista e emprendendo a viaxe a Elche ás 23:00 horas do xoves, xusto ao remate do adestramento. Na noite deste venres terá unha última xornada de adestramento, xa no pavillón municipal Esperanza Lag.
O Amarelle ten a motivación suficiente para afrontar un partido clave, no que sabe que se xogará todo a unha carta para permanecer un ano máis na Primeira División. Ao remate da fase regular, as coruñesas tiñan 26 puntos no seu casilleiro, sumando os tres últimos nunha vitoria ante o Bodegas Sommos Intersala Zaragoza FSF.
Para o club herculino este duelo é unha auténtica final, despois dunha tempada atípica. Para este partido, o cadro galego sofre a baixa de última hora da arxentina Tana Florentín, quen viaxou ao seu país tras o repentino falecemento da súa nai o pasado luns.
Quen si poderá estar no campo é Candela Soria, que volve despois de varias semanas parada por unha lesión do nocello, así como Cris Lourés, quen xa retomou sensacións uns minutos no último partido en casa contra o conxunto maño.
Desta forma, a convocatoria do Amarelle está conformada por
- Leti Rojo
- Sandra Rodríguez
- Tami Gándara
- Candela Soria
- Patri Romaní
- Cris Lourés
- Sofía Rodríguez
- Patri Corral
- Yaiza
- María Gómez
- Anna Escribano
- Lau Doce
