O soño fíxose realidade. O ENCE Marín Futsal é xa equipo de Primeira División. As galegas ascenderon ao primeiro intento ao impoñerse ao seu rival, o Joventut d’Elx, por un marcador de 5-7. Foi un partido cheo de goles, disputadísimo, e no que as xogadoras que adestra Raúl Jiménez foron superiores ás locais baixo a batuta dunha Ceci que se botou a responsabilidade do gol ás costas, nun partido crucial para as aspiracións das galegas.
Este paso á elite do fútbol Sala feminino estatal das de Marín é historico xa que o club nunca antes tiña militado na máxima categoría estatal. Para chegar a este encontro decisivo, a semana previa o Marín tivo que imporse nun duelo fraticida, galegas vs galegas, ante o Valdetires FSF. So podía pasar un equipo a fase final e foron as de Marín.
🙌🏻 O @marin_futsal acadou un ascenso extraordinario. O equipo feminino xogará na Primeira División do futsal nacional.
Unha grande proeza deportiva para o noso pobo.
Parabéns!!!!! 🎉🎉🎊🎊 pic.twitter.com/Ljst2T1lwy
— Concello de Marín (@ConcellodeMarin) June 12, 2021
O partido co Joventut d’Elx non foi sinxelo. De feito as galegas tiñan un marcador en contra de 2-0 aos cinco minutos de xogo. Polo que tiveron que lle dar a volta ao electrónico. Apareceron Ceci e Café para devolver as táboas ao marcador.
Así se chegou ao descanso. As locais resistíanse e volvían marcar a través de Aitana Olaso (3-2). E outra vez a réplica do ENCE Marín Futsal, desta volta coa sinatura das botas de María León (3-3) .
No minuto 36 Ceci adiantaba as xogadoras que adestra Raúl Jiménez (3-4). O encontro volveu a entrar nun toma e daca de goles, pero esta vez co Marín Futsal por diante. Anotou Aitana Olsao 4-4, Ceci de penalti o 4-5, outra vez Aitana Olaso empataba 5-5.
Na recta final do encontro Ceci volveu facer a súa a responsabilidade do gol de de poñer por diante ao seu equipo 5-6 a dous minutos do final. Catro dos sete tantos galegos foron desta futbolista. A puntilla foi de Pau sobre a bucina (5-7).
O acerto de Ceci cara ao marco rival e o bo papel baixo paus de Antía foron determinantes para a vitoria das galegas.
Si si si si si si
Somos equipo de PRIMERA
Final en el Pabellón Esperanza Lag de ElcheJOVENTUT D’ELX – 5
🆚
Ence – Energía & Celulosa Marín Futsal – 7¡¡¡Hasta el final, MARÍN FUTSAL!!!
#xuntadegalicia #concellodemarin #enceplansocialpontevedra pic.twitter.com/2micvmsQCE
— Marin Futsal (@marin_futsal) June 12, 2021
FICHA TÉCNICA
5) JOVENTUD D´ELX: Anaís Torres, Aitana Olaso, Paula Sánchez, Claudia Terrés, Bet Carrasco, Raquel Gadea, Sara Roelas, Judit María Pérez, Lucía del Río, Carolina e Eli Lorenzo
7) ENCE MARÍN FUTSAL: Antía, Jessi, Pau, Ceci, Café, Ana, Alicia, Mar, María León, Marta, Kun, Vera e Inés
GOLES: 1-0 Bet Carrasco (min. 4). 2-0 Claudia Terrés (min. 5). 2-1 Ceci (min. 5). 2-2 Café (min. 20). 3-2 Aitana Olaso (min. 23). 3-3 María León (min. 25). 3-4 Ceci (min. 26). 4-4 Aitana Olaso (min. 29). 4-5 Ceci, de penalti (min. 32). 5-5 Aitana Olaso (min. 37). 5-6 Ceci (min. 38). 5-7 Pau (min. 40).
ÁRBITROS: Colexiados Reig Miralles e Soler Vaño. Amosaron cartón amarelo á futbolsita Kun, do ENCE Marín Futsal.
INCIDENCIAS: Pavillón da Esperanza ante 800 espectadores.
