Primeiras contra segundas. Líder contra aspirante. O partido entre Dépor ABANCA e FC Barcelona B de hoxe, sábado 18 ás 12:00 na Cidade Deportiva de Abegondo, é o partido da xornada na Primera Federación Iberdrola da RFEF. O cruce poderá verse a través da canle de YouTube do RC Deportivo e, como sempre, ao vivo nas bancadas do fortín de As Nosas deportivistas.
O cruce corresponde á 23ª xornada da competición. As culés están a tiro de pedra das galegas que aspiran a volver a tomar o control do posto máis alto da táboa. Así e todo, sendo segundas, e co Barça B como primeiro, As Nosas do Dépor ABANCA asinarían o ascenso directo dado que o equipo blaugrana é filial e non pode ascender.
Dous puntos separan a barcelonesas e coruñesas na clasificación da Primera Federación Iberdrola da RFEF. Por detrás, o Cacereño Feminino e a SD Eibar, ambos os igualados con 39 puntos (dous menos que o Dépor ABANCA).
As 18 convocadas do Dépor ABANCA
A adestradora das galegas, Irene Ferreras ten á súa disposición a todo o cadro salvo Carlota Suárez, na recta final da súa recuperación dunhas molestias nun aductor que lle impediron traballar co grupo durante boa parte da semana. Na lista de futbolistas convocadas está Paula Monteagudo que será a representante do filial deportivista nunha lista de 18 deportistas
#AsNosas convocadas para a 23ª xornada de #PrimeraFederaciónIberdrola, o #DéporABANCABarçaB de mañá ás 12:00 h. na Cidade Deportiva de Abegondo (📺 https://t.co/BRgppwOSdO e APP 📱 RC Deportivo)!
🎟 https://t.co/xTE3C6DZwV pic.twitter.com/qtXauBDLd7
— RC Deportivo (@RCDeportivo) March 17, 2023
No partido da primeira volta, disputado na Ciudad Deportiva Joan Gamper o pasado 19 de novembro, o triunfo foi azulgrana ademais cun gol en propia meta no minuto 87.
As coruñesas confían nas súas posibilidades e tamén no empuxe de #AnosaForza desde a bancada. Dicía Irene Ferreras na rolda de prensa previa: “Creo que vai vir moita xente e iso é un extra para nós. Imos tentar enchernos de toda esa enerxía, de todo ese apoio, desta aura bonita que nos envolve en Abegondo e imos tentar brindarlles unha vitoria das boas contra un dos mellores rivais da categoría que a nivel clasificatorio deixaríanos nun moi bo lugar”.
Lonxe de Barcelona, o filial azulgrana gañou esta temporada ao Granada CF (2-3), Rayo Vallecano (0-3), RCD Espanyol (1-2), Cacereño Feminino (0-2) e Athletic Club B (0-3); empatou co Córdoba CF (1-1) e DUX Logroño (2-2); e caeu na súa visita ao Real Oviedo (3-2), SD Eibar (2-0), CDF Osasuna (1-0) e SE AEM (2-0).
Finalizado o choque, o Dépor ABANCA adestrarase de novo en Abegondo o domingo 19 ás 09:00 horas.
Irene Ferreras: “Respectamos ao rival, pero sobre todo cremos nas nosas fortalezas”
