Os equipos galegos dan por finalizada a tempada 2020/2021 con resultados dispares. O CV Bruxas xogou e venceu contra o D’Elhuyar, por un pleno de sets, mentres que o CV Calasancias Coruña non foi quen de controlar ao Fertiberia Los Campos. Para estes dous equipos remata a tempada, mentres que para o Aceites Abril aínda queda o reto de loitar polo ascenso á SF2 e acompañar así o vindeiro curso ás coruñeas do Autos Cancela CV Zalaeta, agora mesmo únicas representantes galegas na categoría de prata.
Con estes resultados, as de Ames finalizan na sexta posición, con 25 puntos obtidos en oito vitorias de tres puntos e unha derrota dun punto. Pola súa banda, as herculinas rematan antepenúltimas, na oitava posición con 15 puntos de catro vitorias de tres e tres derrotas dun punto.
O último partido do Bruxas
No partido final do presente curso, o Bruxas xogaba en casa ante o colista, o D’Elhuyar. As galegas foron superiores desde o comezo, aínda que as visitantes estiveron sempre á sombra.
O primeiro set saldouse cun axustado 25-22, que cambiaría o mando de poder para a segunda manga, cun 21-25. O Bruxas sentenciou o partido nos dous sets seguintes, cun 25-17 e un 25-14 final.
O Calasancias remata sen vitoria
O CV Calasancias non foi quen de superar ao Fertiberia Los Campos, o quinto clasificado, e perdeu no último partido por un 3-0.
O partido estivo disputado de principio a fin. Na primeira manga, as locais lograron impoñerse pola mínima, cun , 26-24. Xa no segundo, a distancia aumentaba, quedando as galegas cada vez máis descolgadas (25-21). No set final, o 25-18 certificou a derrota das coruñesas.
O Aceites Abril loitará polo ascenso á SF2
O outro equipo galego que competiu esta tempada na Primeira División foi o Aceites Abril CVO. Quedando na segunda posición á fin do curso, a 10 puntos do líder, o CV Oviedo, as ourensás optarán por un posto na categoría de prata.
Ademais, actuarán como anfitrioas desta fase de ascenso á Superliga 2, que se celebrará entre o 23 e o 25 de abril.
