A loitadora galega Nerea Pampín acada o ouro no Campionato de España Absoluto no peso de 68 quilos. A deportista, pertencente ao club Keltoi, proclamouse así campioa estatal. A competición tivo lugar nas instalacións do CTD Infanta Cristina de San Javier (Murcia).
Ver esta publicación en Instagram
A Federación Galega de Loitas Olímpicas acadou bos resultados nos Campionatos de España Absolutos logo dun ano marcado pola falta de continuidade nos adestramentos debido á pandemia de COVID-19. Os metais conseguidos pola expedición galega foron tres ouros, dúas pratas e cinco bronces. Un gran medalleiro para Galicia, pese a atípica tempada que se viviu neste deporte que require contacto.
Os bos resultados das deportistas femininas galegas neste campionato estiveron encabezados por esa primeira praza de Nerea Pampín do club Keltoi nos 68 kg. Mentres, Cristina Rodríguez, do San Ignacio, foi segunda nos 65 kg e Uxía Garra, tamén do San Ignacio, acadou o terceiro lugar nos 57 kg. O mesmo posto acadou Vanesa Muíños que tamén pertence ao San Ignacio nos 72 kg. No caso de Sabela Chan, do Lugo, a loitadora foi cuarta no peso de 72 kg. E por último, Elisabeth Rodríguez, do San Ignacio, conseguía o 6º lugar nos 50 kg
- Club Vilalba 5º – 55 puntos
- Club Touro 11º – 25 puntos
- Club Keltoi 12º – 24 puntos
- Club Pontevedra 15º – 19 puntos
- Club San Ignacio 18º – 10 puntos
FEGALOITA destaca o papel dos árbitros galegos
Non so deportistas participaron na competición en representación da Federación Galega de Loita, tamén o fixeron xuíces. Segundo explica a Federación Galega “o colexio galego de árbitros fixo tamén un bo papel na competición, con grandes actuacións e ocupando cargos de responsabilidade na xestión arbitral da competición. O exemplo con maior proxección é Marcos Araujo Pereira (Vigo, Club San Ignaico), que continúa a ser o referente internacional do Colexio Galego”.
Cabe salientar a 16ª medalla de ouro absoluta do deportista José Cuba Vázquez, do Vilalba, que continúa a facer historia nesta disciplina no ámbito estatal e no galego. Este deportista leva 16 anos sendo campión de España absoluto.
