- As Seleccións Galegas feminina e masculina competirán con equipos chegados de Irlanda, concretamente de Dublín e de Galway, aos que se suman os anfitrións do Den Haag de Países Baixos.
As Seleccións Galegas masculina e a feminina de fútbol gaélico participan esta fin de semana no torneo internacional da Haia ao que Galicia foi convidada por segundo ano consecutivo. A cita é o vindeiro sábado 2 de marzo na citada cidade de Países Baixos. A expedición galega, conformada por preto de 30 persoas, viaxa hoxe venres 1 de marzo.
O Gaelic Football Invitational Tournament leva disputadas xa 16 edicións. Na de 2023 e nesta de 2024 a organización contou coas Seleccións Galegas masculina e feminina que viaxan da man da Asociación Galega de Fútbol Gaélico. O Den Haag da Haia é o equipo anfitrión, de feito ese é o nome da cidade en neerlandés. A competición terá lugar na cancha do Zuider Park e na do WRC Te Werve. Na primeira dispútanse os partidos femininos e na segunda os masculinos.
O ano pasado as Seleccións Galegas debutaban nesta cita. A Irmandiña masculina foi o equipo revelación do torneo, chegando incluso a disputar a final, na que non remataron por alzar o trofeo. O equipo feminino de Galicia non correu a mesma sorte e quedou fóra da final. Ambos os dous conxuntos acudían daquela ao torneo pensando nel como unha preparación de cara ao Mundial. “Deportivamente a nosa participación en 2023 foi un éxito”, indica Ángel Negrete, presidente da Asociación Galega de Fútbol Gaélico.
Once equipos participan na Gaelic Football Invitational Tournament
A lista de equipos participantes neste 16.º Gaelic Football Invitational Tournament ascende a 11 é a seguinte:
Conxuntos masculinos:
- Den Haag (Haia, anfitrións)
- Wanderers (Dublín)
- Erin’s Isle (Dublín)
- Mountbellew-Moylough (Galway)
- Selección Galega (Galicia)
Conxuntos femininos:
- Den Haag A (Haia, anfitrións)
- Den Haag B (Haia, anfitrións)
- Glinsk (Galway)
- Kilconly (Galway)
- St. Brendan’s (Dublín)
- Selección Galega (Galicia)
A convocatoria do técnico Pablo Da Silva, seleccionador da Irmandiña feminina que conta con Juan Larrasq como segundo adestrador, está composta por unha ducia de xogadoras de clubs como: Turonia GFG, Estrela Vermelha, Ourense Gaels e Dublin GAA.
Na lista hai deportistas de Ourense, Gondomar, Compostela e incluso unha xogadora orixinaria do Uruguai. Trátase de Silvia Rita Álvarez, do Turonia GFG de Gondomar. A singularidade aumenta ao coñecer que non é a única da familia que fai parte da convocatoria. A súa filla, Atonella Larrascq Álvarez, e o pai desta, Juan Larrascq (segundo adestrador), tamén defenderán a elástica de Galicia na Haia.
O compostelán afincando en Lugo Alexandre Sanmartín é o adestrador da Selección Galega masculina e citou para este torneo internacional da Haia a 14 xogadores que achegan cinco clubs: Estrela Vermelha, Fillos de Breogán, Keltoi e Ourense Gaels. Hai xogadores de Lalín, Pontevea, Ourense, Compostela, A Coruña, Boqueixón, Vigo, Ponteareas e A Estrada.
Horarios dos partidos no torneo da Haia
Os partidos na competición feminina contan con dous tempos de 12,5 minutos cada un. Ao final da competición tipo liga (todos contra todos), primeiras e segundas clasificadas disputarán a final do torneo.
LGFA – Zuider Park – Campo 5
| HORA | EQUIPO 1 | EQUIPO 2 |
| 9:00 | Den Haag | Wanderers |
| 9:30 | Erin´s Isle | Mountbelew / Moylough |
| 10:00 | Galicia | Wanderers |
| 10:30 | Mountbelew / Moylough | Den Haag |
| 11:00 | Galicia | Erin´s Isle |
| 11:30 | Parada | |
| 12:00 | Galicia | Mountbelew / Moylough |
| 12:30 | Erin´s Isle | Wanderers |
| 13:00 | Den Haag | Galicia |
| 13:30 | Mountbelew / Moylough | Wanderers |
| 14:00 | Erin´s Isle | Den Haag |
| 14:30 | Parada | |
| 15:00 | 1.º | 2º |
A competición masculina organízase en dous grupos. No grupo A están: Den Haag A, Galicia e Kilconly; no grupo B está Den Haag B, Glinsk e St. Brendan´s. Xogarase unha liga de tres en cada grupo con partidos de dous tempos de 15 minutos cada un.
Na parte final da competición os dous primeiros de grupo loitarán por acceder á final, mentres que os terceiros dirimirán quen queda coa 5.ª e 6.ª praza.
GAA – WRC Te Werve
| HORA | EQUIPO 1 | EQUIPO 2 |
| 9:00 | Den Haag A | Galicia |
| 9:40 | Den Haag B | Glinsk |
| 10:20 | Galicia | Kilconly |
| 11:00 | Glinsk | St. Brendan´s |
| 11:40 | Kilconly | Den Haag A |
| 12:20 | Den Haag B | St. Brendan´s |
| 13:00 | Parada | |
| 13:40 | 3.º Grupo A | Grupo A 2.º |
| 14:20 | 1.º Grupo A | Grupo B 2.º |
| 15:00 | 1.º Grupo B | Grupo A 2.º |
| 15:40 | Parada | |
| 16:00 | Gañador semifinal 1 | Gañador semifinal 2 |
Convocatoria da Seleccións Galegas
FEMININA
Nome / Club / Procedencia
- Silvia Rita Álvarez Álvarez / TURONIA GFG / Gondomar (orixinal Uruguai)
- María Silveira Loureiro / ESTRELA VERMELHA / Compostela
- Zara Álvarez Álvarez / TURONIA GFG / Gondomar
- Uxía Otero Fernández / ESTRELA VERMELHA / Boqueixón
- Ánxela María Estévez Salguero / ESTRELA VERMELHA / Compostela (orixinal Ourense)
- Laura Nercellas García / ESTRELA VERMELHA / Lalín
- Carme Reboreda / DUBLIN GAA / Vigo (emigrada en Dublín)
- Sara Sánchez / TURONIA GFG / Gondomar
- Atonella Larrascq Álvarez / TURONIA GFG / Gondomar
- Alexandra Figueroa Vázquez / TURONIA GFG / Gondomar
- Emma Rojas Amosa / ESTRELA VERMELHA / Boqueixón
- Alba Rodríguez Fernández / OURENSE GAELS / Ourense
- Pablo Da Silva (seleccionador) Compostela (orixinario Goián)
- Juan Larrasq (segundo seleccionador) Gondomar (orixinal Uruguai)
MASCULINA
Nome / Club / Procedencia
- David de la Torre Domínguez / ESTRELA VERMELHA / Compostela
- Daniel Conde Prieto / KELTOI / Lalín
- Gábor Pazos Oltai / ESTRELA VERMELHA / Compostela (Pontevea)
- Javier González Cagiao / FILLOS DE BREOGÁN / A Coruña
- Pablo Mascareñas Pazos / ESTRELA VERMELHA / Compostela
- Andrés Novoa Pérez / OURENSE GAELS / Ourense
- Adrián Ambrosio Millos / KELTOI / Vigo
- Víctor Martínez Domínguez / KELTOI / Vigo
- Damián Castro Barreiro / ESTRELA VERMELHA / Boqueixón
- Iago Couso Pazó / ESTRELA VERMELHA / Vigo
- Iago Casales Argibay KELTOI Ponteareas
- Santiago Rodríguez Granja KELTOI Lalín
- Adriano Quiroga Casiñeiro ESTRELA VERMELHA Compostela
- Adrián Rey Paz ESTRELA VERMELHA A Estrada
- Alexandre Sanmartín (seleccionador) Compostela
As Seleccións Galegas veñen de ter un bo resultado na Celtic Cup
A pasada fin de semana Ourense converteuse na capital do fútbol gaélico coa disputa dunha nova edición da Celtic Cup na que as Seleccións Galegas feminina e masculina acadaron senllas medallas (prata e ouro respectivamente).
Un campionato masculino e un subcampionato feminino poñen de manifesto o nivel dos nosos e das nosas futbolistas na especialidade de fútbol gaélico. O campo sintético da Universidade de Ourense albergou a segunda edición da Celtic Cup, un torneo no que participan como convidados equipos de Irlanda e que aspira a converterse nun referente no eido europeo.
Quen é a Asociación Galega de Fútbol Gaélico?
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
A Selección Galega de fútbol gaélico suma 2 metais na Celtic Cup disputada en Ourense
