19 días despois, o Dépor ABANCA regresa á competición. A condición física das futbolistas que estiveron illadas podería verse resentida, aínda que o equipo do RC Deportivo fixo un traballo específico para evitalo. As deportivistas visitan no Antonio Puchades a un Valencia renovado que pouco ten que ver co da tempada pasada.
O adestrador galego, Manu Sánchez, agarda “un partido aberto diante dun equipo que fixo moitos trocos con respecto ao ano pasado. É unha ‘reciclaxe’ que xa comenzou a tempada pasada”.
Para Manu Sánchez, este ano no Valencia “están a traballar con xogadoras moi novas e con ideas que a min gustame moito. Imos ver se vemos un partido aberto con dous equipos que buscan a vitoria. No Antonio Puchades é complicado non xogar ben ao fútbol, é un campo espectacular. Imos ver se sacamos un bo partido e un bo resultado”.
O técnico deportivista admitía que o parón competitivo e de adestramentos, poderá notarse. “No partido non sei se influirá, na condición física de cada unha delas algo tense que notar. Fixemos un plan de traballo exhaustivo para compensar de cara a esta segunda parte da competición para terminar ben a primeira volta e comenzar ben a segunda. Esperemos que vaia ben”.
Dúas xogadoras habituais no esquema de Manu Sánchez esta tempada, Carolina Arbeláez e Ainoa Campo serán baixa par este partido. O técnico non ocultaba o seu peso no equipo pero apuntaba con optimismo que no seu lugar entrarán outras futbolistas que farán a súa achega particular ao bloque.
“Carolina e Ainoa son dúas futbolistas que estaba actuando con regularidade, pero é o momento tamén doutras futbolistas. De que demostren que poden estar. Eu creo que si. Pero teñen que autoconvencerse de que son capaces. Darannos cousas diferentes. Entrarán dúas xogadoras diferentes, con condicións diferentes, que actuarán en posicións que van a provocar diferentes comportamentos que teremos que cambiar e imos ver se son beneficiosos”, explicaba.
Outra que tivo molestias esta semana, pero será da partida, é Helena Torres. En total viaxan 17 xogadoras “con ganas de traer algo importante de aló”, aventura o seu adestrador.
Os paróns afectan á planificación
Nesta singular tempada case todos os equipos de diferentes disciplinas, tiveron que se enfrontar a paróns e illamentos por mor da pandemia de COVID-19. Quen máis, quen menos, tivo un partido adiado e o fútbol feminino e Dépor ABANCA, non foron unha excepción nesta casuística. Estes paróns e arranques inesperados afectan á planificación e ao rendemento dos equipos.
“Esto é un traballo que depende da condición física”, argumentaba sobre este asunto Manu Sánchez. “É complicado con esta situación levar a cabo unha organización equitativa para todo o grupo. Eso ao final nótase nos adestramentos, nos partidos… Onte escoitaba ao adestrador do Barcelona, Lluís Cortés, que se queixaba moito destes paróns. Si se queixa o primeiro clasificado… imaxínate nós!”, apuntaba o técnico branquiazul.
Tal e como advertía o adestrador do Dépor ABANCA: “É difícil programar e reprogramar toda a parte da preparación física de cargas, de descansos… incluídas as viaxes que se cancelan. Todos temos que ser conscientes da realidade, vivir con ela, e mirar para adiante con optimismo”.
Nas fichaxes “precisamos máis cantidade que calidade”, confesa Sánchez
Quedan poucos días para que o Dépor ABANCA poida incorporar novas xogadoras ao seu plantel. Ademais de que a chegada de futbolistas que aportasen una melloría no xogo sería apetecible, o que precisa o conxunto branquiazul son efectivos. Logo da marcha de Rosalía ‘Lía’ Muiños e Kenny Thompson en decembro, o equipo herculino quedou con poucas xogadoras para afrontar a segunda parte da competición.
Consultado pola posibilidade de contar con incorporacións nestes días, Manu Sánchez facía unha comparación moi coruñesa: “O mercado de fichaxes é como o Mercado de San Agustín. Cando vas a ver como vai o xurel ou a caballa e ás veces está moi caro te tes que levar unha lata de conservas”.
Tal e como apuntaba o adestrador do Dépor ABANCA o equipo coruñés está agora mesmo: “Nunha situación na que non estamos logrando atopar o que precisamos. E moito do que precisamos, non o podemos adquirir. Quedan uns días. Imos ver se atopamos algo do que precisamos. Estamos nunha situación na que case xa precisamos máis cantidade que calidade. Estou contento coas xogadoras que temos aquí. Se pode vir alguien a axudar, perfecto, se non imos pelexar. Non imos deixar que ninguén nos quite a ilusión”.
Manu Sánchez: “O fútbol debera tratarse coa mesma seriedade que outros sectores”