- O Mecalia Atlético Guardés recibe á escuadra do Caja Rural Aula Valladolid no primeiro dos sete partidos que disputará en tres semanas.
- O cadro valisoletano, coa viguesa Elba Álvarez nas súas filas, xoga a un ritmo frenético.
O conxunto miñoto do Mecalia Atlético Guardés retoma mañá sábado (A Sangriña, 19:00 horas) fronte ao Caja Rural Aula Valladolid a competición na liga tras un parón de seleccións recibido cos brazos abertos para recargar pilas. O partido terá lugar na Guarda arbitrado polos colexiados Miquel Florenza e Jordi Ausás e contará coa retransmisión en directo pola canle de youtube do Mecalia Atlético Guardés.
Coa inxección de moral que deu irse á pausa con tres vitorias consecutivas na liga Guerreiras Iberdrola e o pase a semifinais da Copa Europea, a reposición de enerxía foi, se cabe, máis completa. E falta fará. O duelo co equipo valisoletano marca o pistoletazo de saída a un encadeado dunha dificultade equiparable a unha etapa alpina nun Circuíto dos 90. Sete encontros en tres semanas.
O feito de que media ducia deles sexan na Sangriña é un aliciente e un reforzo. As obras do Inferno obrigaron ao Mecalia Atlético Guardés a xogar oito partidos a domicilio na primeira volta. Como é obvio, a segunda parte do curso virou tórnalas. Por iso, os seis últimos choques da competición regular serán no recinto guardés. A serie comeza con Caja Rural Aula Valladolid e segue con derbi galego co Porriño, Elche (no encontro de ida de semifinais de Copa Europea), Bera Bera, de novo o conxunto ilicitano (na volta europea), Rocasa e Zuazo.
Oportunidade de ouro para superar ao Caja Rural Aula
Pero, paso a paso. O conxunto valisoletano do Aula será o primeiro escollo para as pupilas de Ana Seabra. O equipo de Valladolid, no que milita a viguesa Elba Álvarez, que xa debutou coa selección absoluta, propón un balonmán veloz, de moita carreira e tenteadores moi altos. Non en balde, o encontro da primeira volta completouse cun empate a 31 que supuxo o primeiro punto a domicilio para o Guardés.
Xustamente por iso tamén cobra vital importancia a vitoria. En primeiro lugar, porque o conxunto miñoto empezaría así a encarrilar a permanencia. En segundo, porque igualaría os 17 puntos do seu rival, sexto na táboa. E en terceiro, porque lle gañaría o golaveraje particular. É dicir, superaría ao Caja Rural Aula na clasificación.
O parón de seleccións deixou boas novas, como a recuperación física ou a clasificación para o Mundial da Paraguai de Pauli Fernández. Con todo, tamén trae unha mala noticia. Patrícia Lima sufriu unha escordadura no seu nocello esquerdo nun adestramento con Portugal. A lesión impediulle xogar o torneo amigable de Batalha coa súa selección e tamén lle privará de competir contra Aula. A central lusa é dúbida para o derbi contra Porriño, pero, se todo vai ben, poderá xogar a ida das semifinais da Copa Europea do domingo 19 na pista de Elche.
Tampouco estarán Ángela Nieto, recentemente intervida de menisco, nin Júlia Nuez, que entra na fase final da recuperación da súa fascitis plantar. O resto do grupo está listo para competir. Incluída Cristina Cifuentes, que vivirá un partido moi especial contra o equipo no que militou 17 anos antes de fichar polo Guardés o pasado verán.
Ana Seabra, adestradora do Guardés: “Entramos nunha fase moi importante e estamos con ganas”
