A adestradora portuguesa do Guardés, Ana Seabra, aproveitou o parón para cargar as pilas. Igual que as súas xogadoras. “O equipo volveu ben, traballando duro e con motivación para o que vén. Sabemos que entramos nunha fase moi importante e estamos con ganas”, especifica a técnica portuguesa do conxunto miñoto.
As tres vitorias consecutivas en Liga Guerreras Iberdrola, así como a consecución do billete para semifinais da Copa Europea son un impulso para o conxunto galego. Igual que o é poder xogar na Sangriña. “É moi importante xogar en casa para conseguir manter o ritmo de vitorias que traemos. É o que queremos”, expresa Ana Seabra, que espera un partido “extremadamente difícil” contra o Caja Rural Aula Valladolid.
Será o primeiro dos sete que terá que disputar o Mecalia Atlético Guardés no próximas tres semanas. “A carga física é grande. Imos ter que respectar e escoitar moito ás deportistas, medir esforzos e cansazos e monitorizar ás xogadoras en adestramentos e partidos. Será moi importante a recuperación posterior a cada encontro para estar nas mellores condicións posibles para o seguinte e poder alcanzar así os obxectivos propostos”, conclúe a adestradora lusa do equipo miñoto.
O Guardés inicia co Caja Rural Aula a fase crucial da tempada
