A COVID-19 tirou de freo de man de todas as competicións, parounas en seco. Algunhas xa non volveron iniciarse, noutros casos retomáronse no punto en que se deixaran, pero hai outra opción que é xusto a que nos ocupa: as competicións nas que a posición na táboa antes do confinamento permite a certos equipos xogarse o ascenso. Tócalles pasar de cero a cen nun partido. O pavillón de Elviña, na Coruña, acolle un destes cruces hoxe sábado 18 ás 17:45 horas. Mídense O Fisgón FutSal e o Valdetires FSF na fase de ascenso á Primeira División do Fútbol Sala Feminino español.
Dado que non pode contar con público nas gradas, ao disputarse a porta pechada, a Federación Galega de Fútbol transmitirá o choque entre estes dous equipos galegos por streaming desde a canle de YouTube da RFGF . En xogo, o pase ao partido decisivo, o que medirá ás gañadoras co Viaxes Amarelle da Coruña. Será nese encontro cando se decida quen ascende do Grupo I da Segunda División Nacional á Primeira División.
Pili Costa, adestradora do Fisgón: “Pídolles ás miñas xogadoras que o compitan a lume para que o gocen. E despois, que Deus reparta sorte!”
Pese a que o parón condiciona fisicamente as xogadoras, que voltan á competición cun mes de preparación pero sen ritmo de xogo, ambos técnicos destacan a importancia da cabeza neste primeiro asalto cara ao ascenso. Pili Costa pediulle ás súas futbolistas que pensasen “que ao final é un partido. Están máis que capacitadas para competilo. Pídolles que o compitan a lume para que o gocen. E despois, que Deus reparta sorte!”.
Diego Pardo, técnico do Fisgón: “a concentración en todos os minutos pode decantar o partido”
Pola súa parte, Diego Pardo, asegura que a “concentración en todos os minutos pode decantar o partido. Non cometer erros que che fagan saír do partido. O equipo que sexa capaz de conseguir iso levará o partido. Aínda que non esteas ben fisicamente, se a cabeza diche que tes que correr, que tes que pelexar e loitar todos os balóns iso trasládase ás pernas e conséguese”.
A quen perxudicou o parón pola COVID-19
Os dous técnicos coinciden en que o parón competitivo motivado pola crise sanitaria da COVID-19 perxudicou máis ao Valdetires, dado que estaba nun gran momento de forma cando se detivo a competición.
O adestrador das ferrolás teno claro: “Ao equipo ao que peor lle veu o parón foi a nós que levabamos unha dinámica moi positiva. Recuperar esa dinámica agora é complicada, preparámonos, pero sen poder enfrontarnos a ninguén, ningún amigable, faltará coller o ritmo”.
Pili Costa, entrenadora do Fisgón: “O parón pola COVID-19, iguálanos cando elas viña dunha ascendente e nos empezabamos unha descendente”
A súa rival de banco, Pili Costa, tamén coincide no seu pensamento: “Antes do confinamento elas estaban nunha liña ascendente e nós empezando a ter unha liña descendente que iamos ter que controlar e reconducir”. Para a entrenadora galega “ao estalar todo isto da COVID e mandarnos para casa, dase unha situación que nos iguala”.
Os dous equipos, sen baixas
O Fisgón chega a este encontro sen baixas e con 14 futbolistas convocadas. Todas as xogadoras do Fisgón estarán en Elviña. “Non temos baixas. Hai algunha xogadora tocada no físico, pero é normal”, di Pili Costa. “Teño a todas dispoñibles, 14 xogadoras e vou con todas ao poder convocar a todas. Teño baixas con respecto ao comezo de tempada pero non coas que estaba a adestrar desde marzo”, matiza.
O mesmo acontece no Valdetires FSF onde toda as xogadoras estarán ás ordes de Diego Pardo que explica: “Dentro da plantilla curta da que dispoño, podo contar con todas as xogadoras, non teño baixas”.
Unha meta conseguida para O Fisgón
Pili Costa non oculta que disputar este play-off expréss de ascenso xa é unha meta conquerida para o equipo que adestra. Confesa que “era un reto practicamente inalcanzable e ao final logramos o soño de meternos no play-off por primeira vez para o club, oxalá podamos pasar ese primeiro partido e xa, se nos enfrontamos nun segundo partido, e o gañador ascende a Primeira… imaxina o que significaría para o club!”
Trátase da primeira vez que as de Marín xogan un play-off de ascenso a unha categoría na que nunca militaron. O Fisgón Futsal creouse no 2015 e foi subindo de categoría en categoría de xeito casi meteórico. Leva varios anos en Segunda División. Foi esta tempada, da man de Pili Costa, que alcanzaron o obxectivo de meterse na loita polo ascenso.
Para as de Ferrolterra superar un play-off é territorio coñecido e a Primeira División Nacional tamén dado que militaron na categoría no pasado.
Para preparar este treito final da competición, as de Marín preparánose “concienzudamente” segundo explican desde o club. O diseño deste retorno á forma física axeitada foi do preparador físico vasco Ánder Muñoz, un bo coñecedor do futsal fem galego. A entrenadora das de Marín considera que o equipo que dirixe chega cos deberes feitos e con capacidade para competir nesta eliminatoria de ti a ti co Valdetires FSF.
Nesta ligazón pódese seguir o partido ao vivo:
O equipo gañador deste partido terá acceso á disputa do segundo encontro, a gran final polo salto de categoría. O escenario será tamén a cidade da Coruña, pero desta volta o sábado día 25, no pavillón da Sagrada Familia. O Viaxes Amarelle xa ten o seu sito e agarda a coñecer quen será o seu rivan no partido que dará o ascenso a un equipo galego á Primeira División do fútbol sala español.
