As Guerreiras abriron a Tarde Laranxa ao grande con todo un festival de goles. Un resultado e un espectáculo digno da estrea das emisións da canle Burela FS TV que se inauguraba con este cruce. As pupilas de Julio Delgado e Lucas ofreceron un recital sobre a rede do Sala Zaragoza que retornou a casa cun pesado 8-3 na maleta.
Saíu en tromba o Pescados Rubén Burela para adiantarse aos 25 segundos de xogo, con Leti ao segundo pau. Cunha gran presión, as mariñás volveron avisar con Lara Balseiro ao traveseiro desde balón parado (minuto 2) e de Leti cunha vaselina (minuto 4), que sacou Carmen Alonso.
O toque de Jenny non se fixo esperar; saltou ao parqué pisando forte, para subir o 2-0, no 4. Conseguiu reducir o Zaragoza, no seguinte minuto, aproveitando a súa primeira oportunidade, de rexeite, con Livia.
Con todo, as laranxas volveron deixar patente a súa autoridade coa rotación de Cami; a brasileira regresaba ás pistas tras as molestias das últimas semanas para selar o 3-1 asistida por Bea Mateos ao segundo pau, en contragolpe.
Seguiu demostrando o Pescados Rubén Burela a súa comodidade sobre a pista e o seu perigo sobre a rede de Ana Etayo. Tentouno Peque por partida dobre, Elena Aragón non chegou ao centro e a Ale de Paz fóiselle alta, pero o cuarto chegou por fin, coa sempre máxica Cilene, no 18, tras superar nun contra un a Aitana. Precisamente a xogadora zaragozana había servido unha de ouro, segundos antes a Paola, para reducir distancias. Dany rozou o quinto nos últimos instantes do primeiro acto.
O Zaragoza case frea o festival goleador á volta do descanso
Acurtou a brecha a Sala Zaragoza no regreso, con Paola, aínda que tan só foi un espellismo. Tivo preto frear o festival goleador das galegas pero todo quedou en nada. En menos dun minuto, Cilene volveu facer acto de presenza para finalizar a triangulación de Leti e Peque e así rubricar o quinto da tarde.
A 6 burelista puxo de novo en aprietos á porteira maña segundos despois, desbaratada polo pau. Con moito sufrimento, o conxunto de Luis Ángel Corredera encomendouse ao peche en área para frear o monólogo mariñán.
Con todo, o Pescados Rubén Burela atopou oco; chegando ao ecuador da segunda parte, Dany asinou o 6-2 en pugna coa defensa visitante sobre a liña de meta, e no minuto 33, Cami o 7-2, cun disparo cruzado tras recibir de Lara Balseiro.
Jenifer Sousa mitigou a avalancha laranxa a falta de dúas para a bucina final cunha picada ao bordo da área. Pero aínda chegou o oitavo con propia porta de María Moreno en lanzamento de M. Cortés; xa fixeran méritos Lara Balseiro e Cami con anterioridade.
O final do partido chegou con tres dobres penaltis para as locais, nas zapatillas de Elena Aragón, sen máis movementos no electrónico e o definitivo 8-3.
🟢⏰ Final final final en Vista Alegre, final con victoria naranja 👏🏾.
Festival de goles en el inicio de la #TardeLaranxa 🤗.@burelafs 8 – 3 @SalaZaragoza #Burela #Futsal @SomosFutsal #FutsalHeart🧡 pic.twitter.com/lLvwj6Bg0D
— Pescados Rubén Burela FS (@burelafs) November 21, 2020
FICHA TÉCNICA
PESCADOS RUBÉN BURELA FS: Sandra Buzón, Cristina, Peque, Lara Balseiro, M. Cortés – quinteto inicial -. Tamén xogaron: Jenny, Ale de Paz, Elena Aragón, Cilene, Bea Mateos, Cami e Dany.
SALA ZARAGOZA FS: Ana Etayo, Livia, Paola, Rafinha, Carmen Alonso – quinteto inicial -. Tamén xogaron: también jugaron Jenifer Sousa, Rapha, Aitana e María Moreno.
GOLES: 1-0, minuto 1, M. Cortés; 2-0, minuto 4, Jenny; 2-1, minuto 5, Livia; 3-1, minuto 7, Cami; 4-1, minuto 18, Cilene; 4-2, minuto 24, Paola; 5-2, minuto 25, Cilene; 6-2, minuto 30, Dany; 7-2, minuto 33, Cami; 7-3, minuto 38, Jenifer Sousa; 8-3, minuto 39, María Moreno (p.p.)
ÁRBITROS: Menéndez Nistal e Vilas López. Amonestaron polo Pescados Rubén Burela con cartón amarelo a Bea Mateos (minuto 10). Mentres que polo Sala Zaragoza foi sancionada con cartón amarelo Rapha (minuto 27).
INCIDENCIAS: Partido correspondente á xornada sexta da Primeira División Feminina de Fútbol Sala da RFEF, disputado en Vista Alegre, a porta pechada por mor das restriccións de aforo a causa da pandemia de COVID-19. O encontro serviu de inauguración da Tarde Laranxa, na que a canle de televisión do club da Mariña empezaba a súa emisión. A cita deportiva contou coa presencia do director técnico do CNFS da RFEF, José Venancio López Hierro, así como co vicepresidente da RFGF, Pablo Prieto.
