A Liga Feminina 2 (LF2) despide a súa primeira fase cun derbi no baloncesto galego. Vigo e A Coruña enfrontaranse co Celta Zorka Recalvi e Maristas Coruña, nun partido este sábado, 27 de marzo, ás 19:00 horas.
Este será un encontro máis relevante para as locais, que queren chegar á loita polo título desde a seguna posición do Grupo A. Actualmente, o Celta ocupa a terceira praza, pero está a só un punto do Osés Construcción Ardoi. Se as navarras perden contra o Arxil e as celestes vencen, as galegas terán máis posibilidades de evitar os grupos dos líderes na segunda fase, e liderar o cuarto grupo.
Pola súa parte, o Maristas Coruña viaxa a Vigo coa tranquilidade de ter asegurada a permanencia matemática na LF2, malia perder no seu último partido contra o Ibaizabal.
Neste encontro, 12 puntos separan aos dous clubs, con traxectorias moi distintas ao longo da tempada. O Celta sumou 19 vitorias en 25 partidos, mentre que o Maristas só foi quen de vencer en cinco ocasións. Así, este será un duelo entre terceiras e terceiras pola cola.
A nivel individual, o pulso estará entre Margarita Davydova no bando celeste e Andrea Pérez no herculino. A primeira delas é a xogadora mellor valorada das viguesas, con 17,16 créditos de media, mentres que a segunda ten unha media de 14,32 puntos.
No apartado anotador, as visitantes son superiores no invidual, con Pérez como máxima anotadora acumulando 333 puntos en total, seguida da súa compañeira Joana Pereira, que suma 327. Tres posicións por debaixo da portuguesa está Celia García, xogadora das celestes, que anotou no que vai de tempada 297.
O público poderá acceder a Navia
Para este encontro, a afección poderá desfrutar en vivo e en directo do duelo Vigo – A Coruña. O Celta pon a disposición da afección entradas ata chegar ao límite de aforo de 150 persoas. As entradas deberán ser reservadas a través do mail partidonavia@celtabaloncesto.com, cos datos persoais completos: nome, apelidos, DNI e teléfono de contacto.
O propio club celeste encargarase de enviar a confirmación da reserva. Unha vez nas portas de Navia, que abrirá as súas portas entre as 18:15 e as 18:45 horas, será imprescindible presentar o DNI.
Vitoria viguesa na ida na LF2
No partido da primeira volta, os dous puntos non quedaron na Coruña. O Celta impuxo o seu xogo a domicilio, vencendo cun 48-77 final. As de Cristina Cantero marcaron o ritmo do partido desde o comezo, cun parcial 0-9, que remataría case dupricando a anotación local. O recital celeste seguiu nos seguintes cuartos ata o último, cando as de Jorge Carreira reaccionaron fóra de tempo.
Con este resultado, o Celta iniciou a súa recuperación despois dunha mala racha, mentres que o Maristas Coruña quedou relegado entón a unha perigosa penúltima posición.
Vitoria do Celta Zorka Recalvi na pista do Maristas Coruña (48-77)
