A LF2 seguirá a ter o vindeiro curso o concurso do Maristas Coruña. As herculinas, pese a perder 61-65 na cada co GDKO Ibaizabal, certificaban a súa permanencia na categoría logo dunha tempada na que estiveron loitando duro por evitar o descenso.
Aínda queda unha xornada pero será en terras viguesas contra o Celta Zorka Recalvi, así que as coruñesas aproveitaron a clasificación matemática para festexar coa súa afección o obxectivo cumprido antes do final da competición. Aínda que con aforo reducido, por mor das restricións para frear o contaxio da COVID-19, as súas seareiras puideron acompañalas na bancada nesta festa da permanencia.
Ollo ao seu baile de festexo!
🏀 Parabéns por esa permanencia na LF2️⃣ @MaristasCoruna‼️👏👏
A falta de un partido para a acabar a temporada, onte confirmaron a continuidade na categoría 💪
🎥Así celebraron as xogadoras do Maristas este logro ▶️ pic.twitter.com/5b0e05TwP8
— A Coruña Deportes (@coruna_deportes) March 21, 2021
Os resultados das escuadras rivais directas na loita por manterse na LF2, que perderon, beneficiaron ao Maristas Coruña que adestra Jorge Carreira. Neste caso foi por un lado, a derrota doutro conxunto galego, o Ulla Oil Rosalía que perdía co Osés Construcción Ardoi por un marcador de 76-50 pero que tamén mantén a categoría; e polo outro, o trunfo a domicilio do CB Arxil (40-58) ante a Agrupación Deportiva Baloncesto Aviles (ADBA).
Por detrás do electrónico desde o primeiro cuarto
No partido ante o GDKO Ibaizabal, as coruñesas quedaron catro puntos por debaixo das súas rivais e loitaron até que se escoitou a bucina. Joana Ferreira foi a máxima anotadora local con 17 puntos, seguida de preto por Andrea Pérez con 16. Precisamente a falta de acerto ante o aro foi o que penalizou ás galegas neste choque.
Desde o primeiro cuarto o Maristas Coruña foi por detrás no marcador (11-13). Ao descanso as herculinas estaba dez puntos por debaixo das visitantes 23-33 tras un segundo cuarto cun tanteo de 12-20.
Foi á volta de vestiarios cando se produxo reacción do Maristas Coruña que se levou o terceiro cuarto por 22-13 colocando o partido nun 45-46. A remontada estaba a tiro de pedra, máis concretamente a un tiro libre, pero non sucedeu. No último cuarto as coruñesas volveron tropezar co GDKO Ibaizabal que se impuxo 16-19 e deixou o partido no definitivo 61-65.
Así, as herculinas achegáronse no marcador, chegado a estar a un só punto de distancia das súas rivais, pero non foron quen de culminar a remontada e finalmente, colleitaron unha derrota que, igualmente tivo sabor doce grazas aos pinchazos das rivais na zona baixa e a clasificación matemática para seguir na categoría o vindeiro curso 2021-2022.
A xogadora máis valorada do partido foi a local Andrea Pérez con 23, seguiulle a visitanta Juana Molina Prados con 21 e empataron a 16 de valoración tres xogadoras do GDKO Ibaizabal: Helmi Tulonen (con 10 asistencias), Elina Koskimies e Rebeca Cotano (máxima anotadora visitante cun 100% de acerto en tiros libres, e un 58% nos tiros de dous).
O Maristas visita ao Celta Baloncesto na última xornada da liga regular
A vindeira xornada, a 26ª da Liga Feminina 2 terá horario unificado polo que todos os encontros vanse celebrar o sábado 27 de marzo ás 19:00 horas. Será entón cando as coruñesas visiten ao Celta Zorka Recalvi no pavillón de Navia en Vigo. As celestes xa teñen asegurado o seu pase á Fase Final da Liga Feminina 2 na que se decidirán dous ascensos á Liga Feminina Endesa. Alí estará tamén o BAXI Ferrol, que segue invicto na competición xustamente tras gañar as viguesas.
FICHA TÉCNICA
61) MARISTAS CORUÑA: Laura Martínez (5), Tatiana Casal (7), Lucía Galán (3), Mara Cortés (4) e Eugenia Filgueira (7), – quinteto inicial -. Tamén xogaron: Joana Ferreira (17), Marina Feijoo (-), Laura Cervelo (2), Andrea Pérez (16) e Laura Hughes (-).
65) GDKO IBAIZABAL: Ane Arrien (-), Ana Iruskieta (6), Juana Molina Prados (12), Helmi Tulonen (12) e Elina Koskimies (10) – quinteto inicial -. Tamén xogaron: Maiane Aizpurua (2), Ainara Ramasco (5), Rebeca Cotano (16) e Nerea Vázquez (2).
PARCIAIS: 11-13, 12-20, 22-13 e 16-19.
ÁRBITROS: Christian Ábalo Buceta e Martín Trasancos Blanco. Sen xogadoras eliminadas por faltas persoais.
INCIDENCIAS: Partido correspondente á penúltima xornada (25ª) na Liga Feminina 2 disputado no Pavillón do Colexio Maristas na Coruña, ante un aforo reducido debido ás medidas preventivas por mor da pandemia de COVID-19.
