- Guardés e Porriño protagonizan un novo derbi das nosas do balonmán galego na máxima categoría desta disciplina no ámbito estatal, a Liga Guerreras Iberdrola.
- Hai máis de 10 anos que o Mecalia non perde un derbi na Sangriña, pero tamén é certo que o Porriño está a facer unha campaña sensacional en dura loita pola segunda praza na clasificación.
- Para engadir interese a un partido que reborda atención, unha vitoria das locais podería certificar a permanencia da escuadra guardesa, aínda que dependería doutros resultados.
Chega o derbi das nosas do balonmán galego nun momento doce da tempada. O Mecalia Atlético Guardés quere aproveitar a súa inercia no momento clave da tempada. Coas semifinais da Copa Europea no horizonte, recibe este mércores (20:45) ao Conservas Orbe Rubensa BM Porriño que marcha en cuarta posición pero está en seria loita por escalar ata o segundo posto da Liga Guerreras Ibedrola. O encontro será dirixido polos colexiados Miquel Florenza e Jordi Ausás. Haberá retransmisión en directo pola canle de youtube do Mecalia Atlético Guardés.
Un novo derbi. Unha nova festa do balonmán galego. Un partido que chega con ambos os dous equipos en bo momento. Desde logo, para o conxunto de Ana Seabra é a mellor etapa deste curso, con catro vitorias consecutivas na liga Guerreras Iberdrola e o billete para unha penúltima rolda continental que se empezará a dirimir o vindeiro domingo en Elche. Pero é que no caso do Conservas Orbe Rubensa BM Porriño, o equipo que adestra Ismael Martínez está inmerso na lea por subir ao segundo lugar da táboa.
O Porriño levou o derbi na primeira volta
O partido é moi especial, como calquera derbi. A liña ascendente do Mecalia Atlético Guardés é incuestionable e gañar un derbi sempre é un xute de enerxía positiva e unha das maiores alegrías que se pode ofrecer á afección.
Con todo, Mecalia Atlético Guardés perdía o derbi das nosas na primeira volta no Porriño, tratará nesta segunda de quitarse a espiña, e as visitantes buscarán que non pase. Os antecedentes avalan as locais. E é que a última vez que a escuadra porriñesa gañou na Sangriña foi o 16 de febreiro de 2013. É dicir, fai máis de dez anos.
Interese extra para o Guardés que pode asinar a permanencia que xa ten o Porriño
E aínda que é verdade que o pasado non xoga, as xogadoras do presente queren facer valer ese reforzo. Ademais, independentemente da indubidable carga moral, sumar dous puntos deixaría ao Mecalia Atlético Guardés practicamente salvado. Ten seis puntos de marxe sobre a zona de play-down e quedan dez por xogarse. Por tanto, se lle favorecesen os resultados noutras pistas, podería verse con +8. Dito doutro xeito, a vitoria daría a permanencia virtual.
Unha continuidade na máxima categoría que o Conservas Orbe Rubensa BM Porriño xa ten garantida. A súa aspiración este curso é outra.
A tempada do equipo que prepara Isma Martínez é sensacional. Está en plena loita pola segunda praza e avantaxa ao Guardés en catro puntos. Conta con Mica Casasola, máxima artilleira da competición por diante de Sandra Santiago, cunha veloz central como Malena Vales e coa capacidade da viguesa Carmen Prelchi no pivote. Ademais, varias ex xogadoras do Guardés integran o seu bloque de xogadoras. Paulina Buforn, Estela Carrera ou Inés Hernández, por exemplo.
Por parte guardesa, Patrícia Lima é dúbida para o encontro. Podería chegar, aínda que aínda que a idea é non forzar a recuperación da súa escordadura de nocello para evitar risco de recaídas. Júlia Nuez vestiuse contra Aula para apoiar ás súas compañeiras desde o banco, pero aínda lle falta un pouco para estar a lume de biqueira.
A que si poderá participar é Nazaret Calzado, que non xogou fronte á escuadra valisoletana por precaución. A baixa de máis longa duración é, por tanto, Ángela Nieto.
En canto ao factor ambiental e a pesar de ter a mala sorte de que o encontro caese na xornada intersemanal, o club espera un gran ambiente na Sangriña. Non virá tanta xente de Porriño coma se fose un sábado, pero si que se agarda unha magnífica entrada para honrar a o derbi de As Nosas. A festa do balonmán en Galicia.
O adestrador visitante, Ismael Martínez, admitía que o factor cancha haino que ter en conta neste derbi. O técnico miraba esa circunstancia con respecto pola complicación, pero en positivo pola ilusón: “O reto de gañar na Sangriña é ilusionante, non vai ser nada sinxelo”. Pola súa parte a adestradora lusa do Guardés, Ana Seabra, anticipaba que será “ un partido emotivo, pero non o imos a encarar pola parte emocional”.
A cita, lembremos, ás 20:45 horas con transmisión ao vivo pola canle de youtube do Mecalia Atlético Guardés.
Ismael Martínez: “O reto de gañar na Sangriña é ilusionante, pero non vai ser nada sinxelo”
Ana Seabra: “Será un partido emotivo, pero non o imos a encarar pola parte emocional”
