A adestradora portuguesa do Guardés, Ana Seabra, recoñece que o seu equipo está “en bo momento” e que “poida que sexa o mellor da tempada”, pero tamén destaca a gran dificultade que supuxo alcanzar estas catro vitorias consecutivas. “É moi duro gañar”.
Así se expresaba a entrenadora do Mecalia Atlético Guardés, Ana Seabra, horas antes do derbi contra o Conservas Orbe Rubensa BM Porriño. “Será un duelo moi emotivo”, vaticina. “Pero traballamos cos obxectivos moi definidos e iso fainos estar convencidas de que non imos encarar o derbi pola parte emocional, senón, por encima de todo, co foco posto sobre as facetas do xogo que queremos seguir potenciando agora e de fronte ao futuro”, sostén Ana Seabra ao respecto do derbi das nosas do balonmán galego.
“Esperamos un partido intenso, competitivo e difícil. Somos conscientes de que Porriño está a facer unha tempada moi boa e ten ganas de continuar así”, apunta a técnica de Águeda, que anima á afección guardesa a encher A Sangriña para empuxar cara á vitoria. “A afección é parte deste equipo. Está en todo momento presente e é moi importante para nós. É a oitava xogadora”, conclúe Ana Seabra.
O partido entre Mecalia Atlético Guardés e Conservas Orbe Rubensa BM Porriño será hoxe mércores 15 de marzo a partir das 20:45 horas na Sangriña con transmisión ao vivo pola canle de youtube do Mecalia Atlético Guardés.
Ismael Martínez: “O reto de gañar na Sangriña é ilusionante, pero non vai ser nada sinxelo”
