A salvación está a cinco puntos de distancia para o Dépor ABANCA. A competición da Primera Iberdrola está xa na súa fase final, e as xogadoras de Manu Sánchez seguen buscando sumar de tres en tres puntos. A seguinte oportunidade será este domingo, 9 de maio, ás 11:00 horas ante o Sevilla FC no Estadio Jesús Navas.
Con seis partidos aínda por disputar (sete no caso das deportivistas polo adiado co Atlético de Madrid), sumar é cada vez máis importante, xa que a marxe de erro é menor. O club branquiazul ocupa actualmente a penúltima posición, por riba do Logroño cunha diferenza de dous puntos, pero aínda por debaixo de Santa Teresa e Espanyol, a un e dous respectivamente. A distancia máis importante nestes intres é co Betis, o último equipo salvado da categoría a esta xornada.
O Dépor ABANCA segue vivo no pozo
Porén, no vestiario do Dépor ABANCA respírase optimismo. Non está a ser unha tempada doada, pero as futbolistas cren no proxecto e vénse capaces de acadar o obxectivo.
Os resultados das últimas semanas axudan. O conxunto herculino vén de colleitar unha espectacular vitoria en casa ante o Madrid CF, ao que venceron por un 3-0. Antes diso, as coruñesas controlaron o partido ante o Valencia CF sen dificultades, aínda que non amarraron o trunfo e viron como as ché empataban nos últimos minutos.
Quen dixo medo? O Dépor ABANCA prántalle cara ao Madrid CFF vencendo 3-0
O Sevilla está en horas baixas
O rival deste domingo para o Dépor ABANCA non está a pasar por un bo momento. Nos últimos oito partidos só venceu nun, xogando precisamente en casa ante un Atlético de Madrid inferior.
En liñas xerais, cando o cadro hispalense actúa como local non é un rival moi forte. Tendo en conta só os partidos en casa, o Sevilla sería 12º. Pola contra, como visitante é un equipo máis contundente e vencedor, caendo derrotado só en sete ocasións.
Antes desta 29ª xornada, as andaluzas tiveron que xogar a Copa da Raíña contra o FC Barcelona. No partido disputado este mércores, as andaluzas sufriron unha derrota por 1-4. As xogadoras de Cristian Toro foron quen de controlar ás invictas catalás durante a primeira metade, chegando co 1-1 ao descanso, para rematar perdendo na segunda parte, cun cadro culé en plena forma.
A convocatoria
