Paso a paso, o Dépor ABANCA achégase á permanencia na Primeira Iberdrola. O equipo no que compite Athenea del Castillo é actualmente penúltimo e ten a salvación a cinco puntos. Por iso, seguir sumando en cada encontro é vital.
A xogadora deportivista móstrase optimista ante os medios de comunicación, diante dos que comparecía esta mañá de venres na previa do partido ante o Sevilla desta fin de semana. “Creo que entre todas imos sacar isto adiante”, aseguraba a futbolista cántabra.
Athenea e as súas compañeiras están nun bo momento de xogo e por fin parecen ter dado coa billa da efectividade. Atesoran dúas xornadas seguidas sen perder, e na última delas gañaron con rotundidade cun 3-0 na ante o conxunto do Madrid CF.
Quen dixo medo? O Dépor ABANCA prántalle cara ao Madrid CFF vencendo 3-0
Coa doce sensación de ter as cousas ben feitas, a dianteira asegura que “o equipo está moi feliz, que é o importante despois de ter gañado o partido da fin de semana en casa”.
Esta é unha motivación extra que serve para viaxar con enerxía a Andalucía, xa que na seguinte fin de semana o Dépor ABANCA enfrontarase ao Sevilla FC. “O equipo afronta o partido con moitísimas ganas e ilusión por seguir sumando 3 puntos para conseguir a permanencia”, declara a cántabra sobre o cruce coas hispalenses.
Athenea del Castillo asegura que o conxunto galego: “Afronta o partido con moitísimas ganas e ilusión por seguir sumando 3 puntos para conseguir a permanencia”
O Sevilla é un rival “moi agresivo”, segundo Athenea
En opinión da xogadora deportivista o desta fin de semana será un rival “moi agresivo” para as branquiazuis. En palabras de Athenea, as hispalenses “están os 90 minutos correndo”. Como punto a favor das galegas, o Sevilla vén de xogar a Copa da Raíña contra o FC Barcelona o pasado mércores. O club catalán é un adversario moi esixente, polo que, se a sorte acompaña, “as pernas van pesar un pouco” nas andaluzas.
Segundo afirma a futbolista, o adestrador Manu Sánchez deu indicación para que o seu plantel se centre en “ir a presionar arriba como estes últimos partidos e intentar que o equipo xogue ben, como esta fin de semana, con boas sensacións e sumar 3 puntos para conseguir a permanencia”.
O Dépor ABANCA deberá aproveitar o mal estado de forma do Sevilla para puntuar, pero para Athenea del Castillo “todos os partidos son importantes, temos que sumar en todos para conseguir o obxectivo”.
Analizando ao rival, a dianteira branquiazul destaca á futbolista Claudia Pina como a xogadora máis importante no equipo andaluz, pero tamén apunta a Toni Payne, “que é moi rápida e habilidosa nos espazos”.
A táctica das deportivistas pasará por evitar que as rivais saian co balón “para que así o teñan máis difícil á hora de chegar arriba. O equipo presionando e roubando o balón en campo contrario síntese máis cómodo”, confirma Athenea del Castillo.
Unha tempada de aprendizaxe
Despois dun gran debut na máxima categoría na pasada campaña, o Dépor ABANCA está a vivir as horas baixas na Primeira Iberdrola. Porén, non todo é negativo. Athenea del Castillo asegura que está campaña está a aprender “moitísimas cousas”, sendo a máis importante “que o equipo está por riba de todo”, afirma a deportista do conxunto coruñés.
“O ano pasado tivemos a sorte de vivir a cara boa do fútbol e este ano estamos vivindo unha parte máis complicada pero é o que te fai crecer día tras día: Ter que afrontar cada partido coma se fose o último”, analiza a pupila de Manu Sánchez.
A futbolista cántabra do conxunto herculino é optimista e confía nas súas compañeiras. “Entre todas temos que remar adiante para conseguir o obxectivo”, conclúe Athenea del Castillo.
