Cando so vale gañar non hai máis remedio que facelo. Unha vez máis o Dépor ABANCA quitouse os complexos, e pese a ter enfronte a un dos mellores equipos desta tempada na Liga Iberdrola de fútbol, deu o do de peito, confiou, e impúxose con rotundidade a todo un Madrid CFF.
As madrileñas aspiran a meterse en competición europea. É certo que chegaban á Cidade Deportiva de Abegondo cargadas de partidos, pero non é menos que son un dos gallitos desta tempada. Xa o avisaba o técnico das galegas, Manu Sánchez, na previa: “O Madrid CFF está a facer unha tempada espectacular. Estamos a falar dunha dos persoais máis sobresalientes da liga. Tres do catro dianteiras titulares da selección brasileira son as súas xogadoras. Futbolistas como Pricila, Estela, Pilar… Podería destacar practicamente a todas. É un equipo que se está enchufado é moi difícil de superar. Acabámolo de ver. Veñen de eliminar a todo un Real Madrid CF na Copa da Raíña”.
Pero o preparador, que mantén a súa confianza plena no grupo que adestra, avisaba de que a necesidade con vértese no mellor empuxe para gañar. “Nós xogámonos moito máis”, advertía. E así era. Se o Dépor ABANCA perdía, a distancia coa liña de salvación empezaba a ser insalvable. As galegas xogaron con paixón e cabeza e gozaron da sorte cara a porta que non tiveron no partido anterior contra o Valencia CF, no que tamén mereceran un trunfo que, nesa ocasión, non chegou.
Gaby abriu o marcador para o Dépor ABANCA
O primeiro tanto das galegas chegarían por medio de Gaby que se impuxo no remate de cabeza a Paola Ulloa. O balón chegaba a internacional venezolana logo do rechace polo longueiro dun envío de Alba Merino. Precisamente Alba Merino foi a autora do segundo tanto do Dépor ABANCA. A fútbolista estase a converter nun auténtico recurso goleador do conxunto branquiazul.
Media hora do #DéporABANCAMadridCFF en #Abegondo! #AsNosas defenden con orde e saen ao contragolpe con velocidade e perigo!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/LOotUXQk6I
— RC Deportivo (@RCDeportivo) May 2, 2021
Con ese resultado as madrileñas empezaron a verlle as orellas ao lobo e apretaron. Manu Sánchez ordenou mudar o xogo no Dépor ABANCA cara a unha férrea defensa e saídas ao contragolpe. Así, logo da paixón dos goles, chegou o fútbol con máis cabeza, orden e concentración na contención do Madrid CFF para evitar que se achegarsen no marcador. Chegouse ao descanso co 2-0 no marcador da Cidade Deportiva de Abegondo.
Xa na segunda metade as deportivistas saíron outra vez marcando territorio, por se as madrileñas tiñan en mente darlle a volta ao encontro nos segundos 45 minutos. Así, no minuto 61 de partido chegou a puntilla, o terceiro para as galegas. Un tanto que asinaba Peke gol (3-0).
Un cuarto de hora para o asubío final do #DéporABANCAMadridCFF en #Abegondo! O tanto de Peke, soa ante a porteira tras un erro da súa central, deixou tocado a un rival que xa non ataca como antes!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/w0Zc3pKhOt
— RC Deportivo (@RCDeportivo) May 2, 2021
Esta vitoria serve ás deportivistas para gañar confianza, salvar unha situación complicada (no caso de ter perdido) pero ademáis saca ás galegas do faroliño vermello da Liga Iberdrola de fútbol. As coruñesas suman 21 puntos, están a cinco puntos da zona da clasificación que outorga a salvación e teñen un partido menos que as súas rivais. O dito: Quen dixo medo?
FICHA TÉCNICA
RC DEPORTIVO ABANCA: Esther Sullastres, Cris Martínez, Blanco, Iris Arnaiz, Noe Villegas, Eva Dios; Gaby, Ainoa Campo, Alba Merino (Carlota, min. 90), Peke (Bedoya, min. 82) e Athenea del Castillo (Patri López, min. 91).
MADRID CFF: Paola Ulloa, Itzi (Lais Araújo, min. 77), Joyce (Maca, min. 37), Lucía León, Mónica Hickmann, Frisbie, Sara Tui (Silvia, min. 77), Rita (Estela, min. 86), Priscila Borja, Valéria (Kerolin, min. 77) e Geyse.
GOLES: 1-0 Gaby (min. 10). 2-0 Alba Merino (min. 34). 3-0 Peke (min. 61).
Árbitra: Beatriz Arregui Gamir (Colexio vasco). Amonestou con cartón amarelo ás xogadoras do Dépor ABANCA Noe Villegas e Iris Arnaiz, mentres que polo Madrid CFF viu cartón amarelo Sara Tui.
INCIDENCIAS: Partido correspondente á xornada nº 27 da competición a Primera Iberdrola de fútbol. O cruce celebrouse na Ciudade Deportiva de Abegondo con 250 persoas seguindo o partido desde nas bancadas. Neste encontro Iris Arnaiz foi homenaxeada antes do pitido inicial co gallo do seus 100 partidos coa elástica branquiazul. Deste xeito, Iris súmase a outras centenarias deportivistas como Gaby ou Cris Martínez.
A terceira centenaria d #asnosas xa ten a súa peza especial d #asnosascores. Parabéns IRIS 🔵⚪️💯⚪️🔵 pic.twitter.com/vl43idhgUi
— RC Deportivo (@RCDeportivo) May 2, 2021
