- As Loitadoras volven á senda da vitoria tras unha montaña rusa de partido que levaron no tie-break.
- As lucenses, que chegaron a dominar por 2-0, tiveron que pelexar ante un duro rival para finalmente levar os 2 puntos.
- Os parciais do partido ante o CV Sayre CC La Ballena foron: 25-21, 25-18, 14-25, 20-25 e 15- 13.
O CV Arenal Emevé puxo fin á súa serie de tres derrotas consecutivas e fíxoo nun partido no que houbo suspense até o final. As Loitadoras impuxéronse a un correúdo CV Sayre CC La Ballena nun tie-break que puña fin a un choque de infarto.
Coa Copa da Raíña no horizonte, o duelo entre CV Arenal Emevé e CV Sayre CC La Ballena presentábase como un choque de alta intensidade no que a tónica esperada era a igualdade. Ambos os conxuntos estiveron á vez nun primeiro set moi parello que as locais comezaron a desequilibrar grazas a tres erros consecutivos das canarias. Con 16-14 tivo que pedir tempo morto Alberto Rodríguez para tentar retomar a iniciativa, pero as Loitadoras apropiáronse do temón. Sempre por diante, o primeiro set acabou en mans locais tras un saque directo de Jimena Fernández Gayoso que puña o 25-21.
A segunda manga arrincou cun CV Arenal Emevé moi contundente que obrigou ao técnico visitante a parar o partido con 4-0. As de casa levaron o refacho até o 6-1, cando Silvia Araco anotou o primeiro punto das canarias grazas a un bloqueo a Mari Capovilla.
A firmeza no bloqueo permitiulle ás Loitadoras levar o electrónico até un 8-1 que tivo un efecto espertador para CV Sayre CC La Ballena. Aos poucos foron remontando as amarelas até chegar a porse por diante 9-10. Ese foi o momento elixido por José Vale para chamar ás súas á lousa. As lucenses axustaron o bloqueo e a recepción para volver apoderarse da iniciativa.
A partir de aí Mosquera, Lavado e Capovilla deron un estirón para apropiarse da rede e a base dunha moi boa defensa as lucenses pechaban un 2-0 que puña a vitoria a tiro de pedra.
Os primeiros compases do terceiro set mostraron a un CV Sayre CC La Ballena con ganas de alargar o partido. O seu bo inicio obrigou a José Valle, adestrador do Emevé, a pedir tempo morto con 2-6, pero as súas instrucións non terminaban de funcionar.
Probou tocando outra tecla que lle adoita funcionar, o dobre cambio de colocadora e oposta. Entraron Sara Urrea e Ainara Burgo por Jimena Fernández e Yael Castiglione buscando un cambio de dinámica que non se produciu porque as canarias aferrábanse con forza ás súas posibilidades de supervivencia aumentando a vantaxe até o oito puntos.
Nese momento (5-13) o técnico lucense dixo basta e volvía chamar ás súas ao banco. Probou de todo o de Abadín, pero unha nube parecía pousada sobre as súas nese terceiro período. As insulars foron un vendaval e non tiveron oposición para levar un set no que chegaron a gozar de vantaxes de até 14 puntos.
As dúbidas despois da terceira manga tampouco se disiparon nas locais no inicio da cuarta. O CV Arenal Emevé sufría moito ante o muro conformado pola brasileira Saldanha e a colombiana Hinestroza. A mellor anotadora e a mellor bloqueadora do campionato empezaron a carburar a tempo por desgraza das lucenses e fortuna das xogadoras do conxunto canario do CV Sayre CC La Ballen, que vía cada vez máis preto o tie-break.
A metamorfose de ambos os dous equipos pasara a ser absoluta: ás canarias saíalles todo e a maxia das lucenses nos dous primeiros apagouse. Tentaron saír do pesadelo as locais, pero foi demasiado tarde. Duelo empatado e a vitoria decidiríase na morte súbita.
A reacción do CV Arenal Emevé
Empuxadas polo público que se deu cita no pavillón municipal de Lugo, as xogadoras que adestra o técnico José Valle comezaron con outra cara o set definitivo. Máis concentradas na recepción e coa contundencia de Jimena Fernández Gayoso en ataque chegaron cunha cómoda vantaxe ao cambio de campo (8-4). Saldanha e Hinestroza volveron ser os puntais de CV Sayre CC La Ballena para buscar a remontada. As canarias limaron a distancia até un só punto (9-8) e obrigaron a José Valle abuscar axustes cun tempo morto.
Chegaron a empatar a visitantes mercé a dous erros na recepción das lucenses, pero cando máis apertaba a soga, as Loitadoras souberon sacarse dous remates espectaculares de Darlevis e Jimena para volver estirar o chicle (12-10). Resistíronse até o final as xogadoras que adestra o técnico Alberto Rodríguez, pero un block out acabo dando o punto definitivo ao CV Arenal Emevé para romper a súa serie de derrotas (xa ían tres consecutivas) cunha moi sufrida e merecida vitoria 3-2 ante o CV Sayre CC La Ballena.
Con este resultado o conxunto lucense colócase na sexta posición da táboa clasificatoria na Liga Iberdrola de voleibol, mentres as súas rivais desta oitava xornada descólganse ata o noveno lugar.
O conxunto que adestra José Valle deberá medirse a vindeira fin de semana co DSV Sant Cugat na súa cancha, o Pavelló Municipal de Valldoreix. Será o sábado 27 de novembro a partir das 16:00 horas. As catalás son as cuartas clasificadas. Así que o equipo galego terá un duro rival ante si mentres busca non retomar o camiño das derrotas. O DSV Sant Cugat aínda non xogou esta xornada. Ten previsto o seu choque contra o Cajasol Vóley Dos Hermanas para mañá domingo 22 de novembro, polo que aínda podería subir ata a terceira praza na clasificación da Liga Iberdrola de volei.
FICHA TÉCNICA
3) CV ARENAL EMEVÉ: Darlevis Mosquera, Inma Lavado, Mariana Capovilla, Yael Castiglione, Marta Otero e Jimena Fernández Gayoso – sexteto Inicial -. Tamén xogaron: Eliana González (Líbero), Lidia Figueira, Ainara Burgo, Sara Urrea e Inés Rivas Fiel.
2) CV SAYRE CC LA BALLENA: Silvia Araco, Theresa Hetmann, Saldanha, Laura Suhr, Sara Esteban e Angie Hinestroza – sexteto Inicial -. Tamén xogaron: Laura Juan (Líbero), Beranuy e Ordoñez.
PARCIAIS: 25-21 (23’), 25-18 (25’), 14-25 (21’), 20-25 (27’) e 15-13 (19’)
ÁRBITROS: Francisco Sabroso e Rafael Tabares
INCIDENCIAS: Partido correspondente á oitava xornada da Liga Iberdrola de voleibol, disputado no pavillón municipal de Lugo ante 200 espectadores nas bancadas. O partido serviu para a concienciación contra a violencia de xénero dentro da campaña NON da Xunta de Galicia.
José Valle: “Era moi importante gañar, facelo en casa, foi dobremente importante”
