O partido da Liga Iberdrola desta xornada, que enfronta ao CV Arenal Emevé co Sayre la Ballena, estará dedicado á difusión da loita contra a violencia de xénero. A presidenta da entidade lucense, Bibi Bouza, reclacou que “como club, deportiva e administrativamente, fomentamos a igualdade”.
Seguindo co compromiso do club pola loita dos dereitos da muller, a mandataria engadiu que “as nosas xogadoras e xogadores son un referente para nenas e nenos, por iso temos a responsabilidade de inculcar nos pequenos e pequenas esa actitude”.
Bouza expresou ademais o seu convencimento de que tanto as mozas como os mozos “mostrarán o próximo sábado que no Arenal Emevé loitamos e queremos poñerlle freo a esta lacra que é a violencia de xénero”.
Yael Castiglione subliña a importancia da visibilidade
No acto de presentación do partido tamén estivo presente a capitá do Emevé, Yael Castiglione, quen sinalou que “como muller e nai, paréceme moi importante difundir esta mensaxe. Gústame que se resalte a igualdade en todos os xéneros e ámbitos, desde a unión e a honestidade, porque así se empezan a inculcar os valores nas novas xeracións”.
Castiglione: “Gústame que se resalte a igualdade en todos os xéneros e ámbitos”
Desde o club transmiten o seu compromiso coa erradicación da violencia de xénero, e resaltan a importancia de que o traballo sexa “constante e diario” e a “visibilización e concienciación” como claves para lograr o cambio na sociedade.
Ao acto acudiron tamén o adestrador do equipo, José Valle, o deputado de Promoción Económica e Social, Pablo Rivera, o concelleiro de Xuventude e Deporte, Mauricio Repetto, a concelleira de Igualdade e Muller, Silvia Alonso, o xefe do Servizo Provincial de Deportes de Lugo, Manuel Otero Cadramón e a xefa de coordinación da consellería de Emprego e Igualdade, Patricia Dans.
O Emevé quere reencontrarse coa vitoria
Na xornada da fin de semana, as lucenses recibirán o sábado ás 17:00 horas ao Sayre La Ballena, o terceiro equipo canario da Liga Iberdrola. As galegas precisan volver ao bo momento de xogo e sensacións previas ás derrotas sufridas ante o Barça, Urbaser e Sanaya Libby’s.
José Valle: “Traballamos a diario para mellorar individual e colectivamente”
José Valle, adestrador do Emevé, confía nas capacidades do seu plantel e declarou que “vimos de perder ante os dous mellores equipos da liga, sobre todo por orzamento. Traballamos a diario para mellorar individual e colectivamente, vimos coa firme intención de seguir mellorando para conseguir os obxectivos que nos propuxeramos”.
💜
O Arenal Emevé dedicará o seu choque fronte a Sayre á difusión da loita contra a Violencia de Xénero.
A cita terá lugar o vindeiro sábado, ás 17:00 horas, no Pavillón Municipal de Lugo. #NON#NONaviolenciadexenero#igualdadenarede@Xunta@concellodelugo@depulugo pic.twitter.com/jsdwezJqEB— Arenal Emevé (@cvemevelugo) November 18, 2021
