O penúltimo partido da tempada para o Cidade de As Burgas rematou cun empate e cun dato a celebrar: o primeiro hat trick da xoven xogadora Sol Pedrera. As ourensás finalizaron o seu encontro en táboas cun tanteo final no electrónico de 5-5. No bando rival, o conxunto do Rayo Majadahonda puido festexar que, con este resultado ante o conxunto ourensá, salva a categoría e seguirá o vindeiro ano na elite do futsalfem estatal.
Pola súa parte, as galegas non tiñan xa nada en xogo, ao estar matemáticamente descendidas. Malia todo, as futbolistas verdibrancas que adestra Manolo Codeso caracterízanse por loitar cada balón, ofrecer o mellor de si mesmas en cada partido e gozar sobre a pista de cada minuto de xogo. Así, as ourensás ofreceron un gran espectáculo futbolístico na pista do Majadahonda.
O Cidade de As Burgas presionou para buscar o empate
O duelo comezou cun tempraneiro disparo de Moni, rondando a portería galega. Aos dous minutos de xogo, Cels adiantaba ás majas aproveitando un centro desde a banda esquerda da propia Moni.
Entón, Codeso solicitou un tempo morto que resultou nun gol de Sol Pedrera aproveitando un envío longo de Lastra e vencendo no man a man ante Lauri. Sería o primeiro dunha tarde para recordar para a galega.
Nunha contra, as madrileñas, con moito en xogo, responderon cun tiro de Cels, que superou a Lastra volvendo a poñer por diante ás locais. Entón, Sonia Pacios volvía a poñer o empate no marcador cun disparo afastado.
Lonxe de contentarse co empate, as xogadoras do Cidade de As Burgas buscaron a vitoria antes do descanso. Esta chegou de novo da man de Pacios e Pedrera, coa segunda aproveitando un balón solto do remate da primeira.
Na segunda parte, o Rayo Majadahonda conseguía anotar dous goles en cuestión de minutos, o primeiro deles de Cels, nunha combinación ofensiva, e o segundo de Pitxi, de disparo cruzado.
Pasado o ecuador as locais afianzaban a súa vantaxe cun gol de Vero pola escuadra á saída dun saque de banda. Pouco despois, Manolo Codeso decidiu apostar por un xogo de cinco, con Ana Lastra de porteira-xogadora, para ir a polo partido e a fórmula saiu ben.
GOOOOL de @soolpedrera que marca su primer hattrick en Primera División
Minuto 35 @RMajadahondaFS 5 – @cidadeasburgas 4— Cidade de As Burgas FS (@cidadeasburgas) June 5, 2021
O conxunto galego conseguiu así recurtar distancias co que sería o terceiro gol de Sol Pedrera, no seu primeiro hat trick na Primera División. A dous minutos para o pitido final, as ourensás seguían por debaixo, pero un gol de Clara igualou o partido para o Cidade de As Burgas.
Nos últimos minutos as galegas buscaron o sexto, fronte a un equipo madrileño centrado en afianzar o punto que lle valía a permanencia. O marcador permaneceu inamovible e o duelo rematou no 5-5.
FICHA TÉCNICA
RAYO MAJADAHONDA: Lauri Tresguerres; Cels, Pitxi, Coral e Moni – quinteto inicial -. Tamén xogaron: Vero, Peque, Marta Rodríguez, Chili e Carmen.
CIDADE DE AS BURGAS: Ana López Lastra; Sonia Pacios, Lucía Nespereira, Clara Fernández, e Nahir – quinteto inicial – Tamén xogaron: Sol Pedrera, Canolich, Amelia e Aroa Oliveira.
GOLES: 1-0, min. 2 Cels; 1-1, min. 3 Sol Pedrera; 2-1, min. 4 Cels; 2-2, min. 11 Sonia Pacios; 2-3, min. 15 Sol Pedrera; 3-3, min. 22 Cels; 4-3, min. 22 Pitxi; 5-3, min. 30 Vero; 5-4, min. 35 Sol Pedrera; 5-5, min. 38 Clara.
ARBITRAXE: Mayo López e Moreno Durán do colexio madrileño. Recibiron sanción con cartón amarelo as futbolistas Sol Pedrera do Cidade de As Burgas e Coral do Rayo Majadahonda.
INCIDENCIAS: Partido correspondente á novena xornada da segunda fase de Primera División no grupo D da RFEF. Á fin do encontro ambos clubs homenaxearon a Mondo que deixará de ser adestradora majariega ao final da temporada en curso.