O Victoria FC e Deportivo Abanca “B” pechan mañá a primeira volta na 1.ª División Nacional Feminina no Campo de fútbol Municipal de Santa Isabel (17.00 horas). O duelo entre dous dos equipos cun gran trato de balón, pon en xogo tamén a terceira posición da táboa, agora en mans das herculinas por tan só dous puntos de diferenza (25 do Dépor “B” e 23 do Victoria FC).
O plantel que dirixe Chivi García chega a este importante encontro coa moral alta tras encadear por primeira vez na campaña tres triunfos consecutivos e con todas as xogadoras listas para saltar ó campo despois dunhas semanas complicadas de lesións.
Chivi García, adestrador do Victoria FC
“Moitas delas adestran co primeiro equipo o que conleva pertencer a unha plantilla de Primeira División. Será un encontro complicadísimo”.
“Chegamos moi ben. As tres vitorias consecutivas e o xogar na casa teñen que dar confianza á plantilla para competir neste bonito partido fronte a un dos mellores equipos da categoría”, afirma o técnico santiagués. Chivi García describe ó Dépor B como “unha selección de xogadoras, de moito talento e poderío físico”. “Moitas delas adestran co primeiro equipo o que conleva pertencer a unha plantilla de Primeira División. Será un encontro complicadísimo”, engade.
O compostelán insiste en que “temos que facer as cousas moi ben, coñécennos e saben o que imos propoñer dentro do campo, senon estamos atentas nas transicións defensivas faránnos moitas ocasións pois contan con xente moi rápida arriba”.
Duelo directo entre os dous equipos que lideran a categoría
Será unha última xornada da primeira volta moi emocionante pois tamén haberá duelo entre o primero e o segundo clasificado, o Viajes Interrías e o CD Monte, co que o triunfo tamén permitirá ó gañador en Santa Isabel recortar diferenzas cos dous de arriba.
Chivi García anima ós siareiros a acercarse mañá ó campo. “Ogallá a xente veña animar ás xogadoras. É o último partido da primeira volta, contra o equipo de máis nome da categoría e xogámonos a terceira praza contra elas. Creo que non se pode pedir máis”, suliña o adestrador do Victoria FC destacando a igualdade entre ámbolos dous rivais empatados en estadísticas como goles a favor (32) e en contra (12).
