- Catro futbolistas galegas veñen de ser convocadas pola Selección Española en categorías inferiores. Tratase de Sara Couso e Lúa Arufe no caso da Vermella Sub-16 e Lucía Rivas e Elena Vázquez na Sub-17.
A Selección Española mira cara Galicia non so no primeiro equipo co protagonismo de Teresa Abelleira coa Selección Española absoluta. Nas categorías de base o fútbol galega tamén está a contar con deportistas que visten a vermella.
Na categoría Sub-16, a seleccionadora estatal Laura del Río citou a Lúa Arufe e a Sara Couso. As futbolistas do Victoria FC e do AJ Lérez, respectivamente, son unhas das fixas na Selección Galega de fútbol. Sara Couso, ademais, estrearase nunha convocatoria coa Selección Española. O combinado estatal concentrarase a partir do luns 2 de outubro para realizar varias sesións de adestramento na Cidade do Fútbol de Las Rozas. Esta concentración estenderase ata o mércores 4 de outubro.
Na categoría Sub-17, pola súa banda, son dúas as galegas que forman parte da citación do seleccionador Kenio Gonzalo. Elena Vázquez e Lucía Rivas, ambas as dúas xogadoras do RC Deportivo ABANCA e tamén pezas capitais na Selección Galega de fútbol.
As dúas futbolistas galegas concentraranse na Cidade do Fútbol de Las Rozas a partir do luns 2 de outubro para realizar varias sesións de adestramento. Dita concentración, ao igual que a Sub-16, estenderase no tempo ata o mércores 4 de outubro, segundo informa a Real Federación Galega de Fútbol que felicitaba ás nosas futbolistas pola súa chamada á Selección Española.
